Կիրպրոսի որոշ բանկերի հանցավոր սխալները, անփութությունն ու չարաշահումները, ինչպես նաև երկրի Կենտրոնական բանկի վատ վերահսկողությունը բերել են նրան, որ Կիպրոսը ստիպված է ԵՄ-ից ֆինանսական օգնություն խնդրել: Այս մասին ազգաբնակչությանն ուղղված ելույթում հայտնել է Կիպրոսի նախագահ Դիմիտրիս Խրիստոֆիասը: Իր ելույթում նախագահը բացատրել է իրավիճակի ողջ բարդությունը և իր՝ «եռյակի» (Եվրահանձնաժողով, ԵԿԲ և Արժույթի միջազգային հիմնադրամ) կողմից առաջարկված կոշտ պայմաններին համաձայնելու պատճառները:
Կիպրոսը դեռ հունիսին էր Եվրախմբից օգնություն խնդրել, սակայն համաձայնությունը չէր ստորագրվել, քանի որ որոշված չէր օգնության գումարի չափը: Ենթադրվում է, որ այն կհասնի 10 միլիարդ եվրոյի: Բոլոր պայմանները երկուշաբթի օրը Բրյուսելում ներկայացվել են եվրոգոտու ֆինանսների նախարարներին: Ծրագրվում է, որ Կիպրոսին օգնություն տրամադրելու հարցը կքննարկվի դեկտեմբերի 13-ի Եվրախմբի հանդիպման ժամանակ: Վերջնական որոշում չկայացնելու դեպքում նախարարները այս հարցին կվերադառնան հաջորդ տարվա հունվարի 21-ին:
Խրիստոֆիասն ասել է, որ իրենք փորձել են ֆինանսավորման այլ աղբյուրներ փնտրել, սակայն ներքին ֆինանսավորում գտնելը հնարավոր չէ: «Չնայած ստեղծված իրավիճակի համար բանկերի ողջ պատասխանատվությանը, մենք չենք կարող թույլ տալ, որ նրանք փլուզվեն: Դա երկրի և ժողովրդի նկատմամբ անպատասխանատու և հանցավոր քայլ կլիներ մեր կողմից»,- ասել է նա՝ հավելելով. ««Եռյակի» հետ ծանր բանակցությունների ժամանակ մենք փորձեցինք այնպես անենք, որ նրանք լսեն մեր դիրքորոշումները»:
«Համաձայնագիրը ենթադրում է ցավոտ միջոցառումներ անցկացնել, որոնք այլ դեպքերում ես ոչ մի գնով չէի համաձայնի քննարկել: Ես գիտակցում եմ, որ այս համաձայնագիրը մեր երկրի քաղաքացիների մոտ դժվարություններ կառաջացնի, և ամբողջովին կիսում եմ նրանց անհանգստությունն ու անվստահությունը»,– ասել է Կիպրոսի նախագահը:
