Դևիդ Ռեմնիկը՝ ամերիկյան հեղինակավոր The New Yorker ամսագրի գլխավոր խմբագիրը, պնդում է, որ Հիլարի Քլինթոնը, ով այժմ զբաղեցնում է պետքարտուղարի պաշտոնը, 2016 թվականին նախագահի թեկնածու կառաջադրվի:
Հրատարակության կայքում տեղադրված հոդվածում Ռեմնիկը բացատրում է ընթերցողներին, որ նման կարծիք իր մոտ ձևավորվել է Սաբանայի ֆորումից հետո, որը նվիրված էր Իսրայելի խնդիրներին:
Ռեմնիկն առաջին հեղինակավոր քաղաքագետն է, ով բարձրաձայն խոսել է այդ մասին:
Նա նշել է, որ իր ենթադրությունները հաստատել են ֆորումի կազմակերպիչները, ովքեր ֆորումի ընթացքում ցուցադրել են պետքարտուղարի ձեռքբերումները լուսաբանող տեսահոլովակ: Ռեմնիկը այդ տեսահոլովակը անվանել է «Քլինթոնի նախընտրական քարոզարշավի միջազգային գովազդ»:
Նշենք, որ The New York Times-ը նույնպես այսօր հրապարակել է մի հոդված, որը նվիրված է պետքարտուղարի գործունեությանը, որտեղ ասվում է, որ Նյու Յորքի քաղաքապետ Մայքլ Բլումբերգը Քլինթոնին առաջարկել է կենտրոնանալ տեղական քաղաքականության վրա և հաջորդ տարի փոխարինել իրեն քաղաքապետի պաշտոնում:
Հիշեցնենք, որ Քլինթոնն ավելի վաղ The Wall Street Journal-ին տրված հարցազրույցում ասել էր, որ պատրաստվում է լքել մեծ քաղաքականությունը և իրեն ամբողջովին նվիրել անձնական կյանքին:
