Ուկրաինայի վարչապետ Արսենի Յացենյուկը վերադարձել է աշխատանքի և Գերագույն ռադային կոչ է անում հուլիսի 31-ի արտահերթ նիստի ժամանակ ընդունել ավելի վաղ տապալված օրենքները: Այս մասին նա այսօր հայտարարել է ճեպազրույցի ժամանակ՝ հայտնում է korrespondent.net-ը:
«Ես կուզենայի հիշեցնել, որ հինգշաբթի օրն առանց կոալիցիայի կանխատեսելի լուծարման ձախողվեցին հիմնական օրենքները (փոփոխությունները պետական բյուջեում, Հարկային օրենսգրքում, գազատրանսպորտային համակարգի բարեփոխումները- korrespondent.net-ի խմբ.)»,- ասել է Յացենյուկը:
Նա նշել է, որ այդ պատճառով այժմ միջոցներ չկան բանակի ֆինանսավորման համար, նաև դադարեցվում է Արժույթի միջազգային հիմնադրամի (ԱՄՀ) հետ համագործակցության ծրագիրը:
«Ես խոսել եմ Համաշխարհային բանկի և ԱՄՀ տնօրենի հետ և կցանկանայի հայտարարել, որ կառավարոթյունը նորից այդ օրենքները խորհրդարան կմտցնի: Դիմում եմ խորհրդարանի բոլոր անդամներին՝ հինգշաբթի օրը գալ և քվեարկել այդ օրենքների օգտին»,- ասել է Յացենյուկը:
Նրա խոսքով՝ եթե նշված օրինագծերն ընդունվեն, այդ ժամանակ հնարավորություն կլինի Դոնեցկի և Լուգանսկի վերականգնումը ֆինանսավորելու: «Եվ օգնելու ամբողջ Ուկրաինային: Եվ մենք ԱՄՀ-ից ու Համաշխարհային բանկից կստանանք 1.5 մլրդ դոլար: Եթե մենք դա չենք ընդունում, այդ ամենը չենք ստանում»,- նշել է նա:
Հիշեցնենք՝ հուլիսի 24-ին Յացենյուկը Գերագույն ռադայում կոալիցիայի լուծարման կապակցությամբ հրաժարական էր ներկայացրել:
