Սիրիական զորքերն այսօր Դարաա քաղաքից (Դամասկոսից 8 կմ հարավ) դուրս են մղել զինյալներին և ականազերծել փողոցները: «Սուրիա» հեռուստակայանը հաղորդում է, որ առաջիկա ժամերի ընթացքում խաղաղ քաղաքացիներին թույլ կտրվի վերադառնալ քաղաք:
3 շաբաթ Դարաան գտնվում էր «Ջեբհատ Ան-Նուրսա» խմբավորման ձեռքերում, որը կապված է «Ալ-Կաիդա»–ի հետ: Վարձկան տեռորիստները քաղաքը դարձրել էին իրենց հիմնական բազան և այնտեղից իրականացնում էին զինված հարձակումներ: Զինվորներն ազատել են նաև ահաբեկիչների կողմից որպես «կենդանի վահան» օգտագործվող տեղաբնակների մի քանի խմբերի:
Զինվորական ղեկավարությանը գործողությունների ընթացքում հաջողվել է կանխել «Մեզզա» ռազմական օդանավակայանը գրավելու ապստամբների փորձը:
«Ապստամբները, բաժանվելով մի քանի ոչ մեծ միավորումների, փորձում են դուրս գալ շրջափակումից: Նրանց առաջխաղացմանը հետևում են ուղղաթիռները, որոնք օդից հարվածներ են տեղում»,- գրում է «Ալ-Աբբաս» թերթը:
«Ալ-Ջազիրա»–ն հաղորդում է, որ սիրիական թնդանոթները կրակի տակ են առել Դամասկոսի ծայրամասերը:
Հալեպում դաժան ընդհարումներ են տեղի ունենում: Էլ-Մանսուրում սիրիացի զինծառայողները ոչնչացրել են 11 ջիփերից բաղկացած շարասյունը` նրանց վրա տեղադրված զենքերով հանդերձ, ինչպես նաև Թուրքիայի սահմանի կողմից մոտեցող տեռորիստներով լցված 12 բեռնատար:
Հոմս–Համա մայրուղում ամերիկացի պարեկները գտել և ապամոնտաժել են 4 հրթիռային սարքավորումներ: Այդ շրջանում ոչնչացվել է նաև իսլամիստների զինված խոշոր խմբավորում: Երկրի հյուսիսում վնասազերծվել է 6 ական: Սարմինհայի և Էրիհայի ճանապարհին հայտնաբերվել են լրտեսներ:
Լիբանանի հետ սահմանին սահմանապահները հայտնաբերել են վարձկանների խմբեր, որոնք փորձել են թափանցել երկրի խորքը` դեպի Էլ-Քուսեիր քաղաք` առաջխաղացման համար օգտագործելով մոտոցիկլետներ: Զինյալները հայտնաբերվել են Հիրբեր-Նուիեմաթ տեղանքի մոտակայքում: Փոխհրաձգության ընթացքում նրանց մի մասը սպանվել է, իսկ մյուս մասը` նահանջել Լիբանան:
