Կարեն Դեմիրճյանի անվան մարզահամերգային համալիրում շարունակվում է բռնցքամարտի 2012թ. երիտասարդական Աշխարհի առաջնությունը:
Այսօր՝ մրցումների հինգերորդ օրը, ռինգ դուրս կգան Հայաստանի 5 ներկայացուցիչներ:
Երևանի ժամանակով 15:15-ին պայքարի մեջ կմտնի Հայաստանի առաջին ներկայացուցիչը՝ 56 կգ քաշային Տարոն Սողոմոնյանը: 1/8 եզրափակիչում Սողոմոնյանի հակառակորդն Ուզբեկստանը ներկայացնող Ջահոնգիր Դավիդովն է: Տարոնը կմենամարտի կապույտ անկյունից:
64 կգ քաշայինների պայքարում կփորձի իր տեղը քառորդ եզրափակիչում ապահովել Գոռ Երիցյանը: Երիցյանը մենամարտելու կուբացի բռնցքամարտիկ Քևին Հայլեր Բրաուն Բազայինի դեմ: Գոռը կմենամարտի կարմիր անկյունից:
1/8 եզրափակիչում իր մենամարտը կանցկացնի 75 կգ քաշային Արտավազդ Արոնյանը: Արոյանն իր ուժերն է չափելու հույն մարզիկ Պոլինեյկիս Կալամարասի դեմ և հանդես է գալու կապույտ անկյունից:
64 կգ քաշայինների պայքարից զատ տեղի կունենա նաև Հայաստանի և Կուբայի ներկայացուցիչների ևս մեկ հակամարտություն. 52 կգ քաշային կարգում կմենամարտեն Հենրիկ Մոկոյանն ու Խորխե Լուիս Կորդերո Պարլայը: Բռնցքամարտիկները կպայքարեն քառորդ եզրափակիչ դուրս գալու համար: Մոկոյանը մենամարտելու է կարմիր անկյունից:
81 կգ քաշային կարգում հանդես եկող Նիկոլ Հարությունովն իր ուժերն է չափելու ԱՄՆ-ի դրոշի ներքո հանդես եկող Էնթոնի Սիմսի հետ: Մենամարտը տեղի է ունենալու 1/8 եզրափակիչում: Նիկոլը մենամարտելու է կապույտ անկյունից:
