2012 թ. նոյեմբերի 30-ին ՀՀ Շիրակի մարզի ընդհանուր իրավասության դատարանում շարունակվել է Մատաղիսի գործի քննությունը:
ՀՔԱ Վանաձորի գրասենյակի փոխանցմամբ՝ դատական նիստին ներկայացել են տուժողների իրավահաջորդները, ամբաստանյալները, նրանց շահերի պաշտպանը: Այս դատական նիստին վերջապես ներկայացել են նաև բոլոր երեք մեղադրողները:
Նիստի սկզբում մեղադրող կողմը միջնորդություն ներկայացրեց վերսկսել դատաքննությունը և հրամանատար Իվան Գրիգորյանին կանչել հարցաքննության: Դատարանը ընթերցեց ոստիկանության կողմից ուղարկված գրությունը, որը պարունակում էր տեղեկատվություն այն մասին, որ հնարավոր չէ գտնել Իվան Գրիգորյանի բնակության հասցեն: Ամբաստանյալների պաշտպան Հայկ Ալումյանը միջնորդության վերաբերյալ նշեց, որ այն պարզապես պատրվակ է ձգձգելու համար դատական վիճաբանությունների փուլին անցնելը և կտրականապես առարկեց բավարարել միջնորդությունը:
Դատարանը մերժել է միջնորդությունը և անցել վիճաբանությունների փուլ:
Այնուհետև մեղադրող կողմի միջնորդությամբ դատական նիստը ընդմիջվել է հինգ րոպեով, որը սակայն «անհասկանալի» պատճառներով ձգձգվել է մոտ մեկ ժամ:
Ընդմիջումից հետո մեղադրողներից մեկը ընթերցեց ճառի ներածական մասը, որով պնդեց մեղադրանքը, այնուհետև խնդրեց դատական նիստը ընդմիջել մինչև 2012 թ. դեկտեմբերի 4-ը ճառը ամբողջությամբ ներկայացնելու համար:
Հիշեցնենք, որ Մատաղիսի գործի վերաբերյալ իրենց մտահոգությունն էին հայտնել մի շարք հասարակական կազմակերպություններ: Իսկ 2012 թ. նոյեմբերի 29-ին մամուլի ասուլիսովհանդես էին եկել գործով փաստաբան Հայկ Ալումյանը և «Բանակն իրականում» քաղաքացիական նախաձեռնության անդամ Լալա Ասլիկյանը, որի ընթացքում բարձրաձայնել էին գործի վերաբերյալ իրենց մտահոգությունները:
