ՌԴ վարչապետ Դմիտրի Մեդվեդևն իրական է համարում Վրաստանի նոր կառավարության հետ երկխոսությունը,- փոխանցում է ITAR-TASS-ը:
«Սա ամենահեշտ ճանապարհը չէ, սակայն Ռուսաստանը միշտ ասել է, որ մենք պատրսատ ենք երկխոսության Վրաստանի նոր կառավարության հետ, բայց, իհարկե, հաշվի առնելով գոյություն ունեցող աշխարհաքաղաքական իրողությունները և Աբխազիայի և Հարավային Օսիայի վերաբերյալ որոշումները, որոնք ընդունել է Ռուսաստանը»,- հայտարարել է նա Kommersant թերթին տված հարցազրույցում:
«Վրաստանի ներկայիս վարչապետ Բիձինա Իվանիշվիլին քաղաքական գործիչների ուրիշ սերունդ է, տեսնենք նրա ռեալ գործողությունները: Այնտեղից ինչ-որ ազդանշաններ են գալիս այն մասին, որ լավ կլիներ կապ հաստատել, առայժմ ոչ դիվանագիտական մակարդակով` չնայած հիշեցնեմ, որ դիվանագիտական հարբերությունները խզել է Վրաստանը, ոչ թե ՌԴ-ն, մենք ուշադրությամբ կվերաբերվենք այդ ազդանշաններին: Ես ոչ մի վատ բան չեմ տեսնում հումանիտար համագործակցությունը վերականգնելու մեջ, ինքնաթիռներ թռչում են, կապերը մարդկանց միջև, փառք Աստծո, շարունակվում են, մշակութային կապերը պահպանվել են, առևտրատնտեսական կապերը ևս կարող են վերականգնվել»,- ասել է Մեդվեդևը:
«Միակը, ում հետ ես պատրաստ չեմ մի սեղանի շուրջ նստել` Միխեիլ Սաակաշվիլին է: Նա պատերազմ է սկսել, հանցանք է գործել, հանցանք՝ առաջին հերթին վրացի ժողովրդի առջև, այլ ժողովուրդների առջև, որոնց քաղաքացիների մահվան համար ինքը մեղավոր է»,- հայտարարել է ՌԴ կառավարության ղեկավարը:
