Աշնանային զորակոչի, զորակոչիկների դիմում-բողոքների, նրանց մոտ առավել հաճախ հանդիպող հիվանդությունների մասին «Առաջին լրատվական»-ը զրուցեց «Զինվորի պաշտպանության կոմիտե»-ի նախագահ Գոհար Արմենակյանի հետ: Վերջինս նշեց, որ աշնանային զորակոչի հետ կապված առ այսօր ստացել են 65 դիմում-բողոք:
Նրա խոսքով` բոլոր բողոքները պարտադիր քննարկվում են, որովհետև իրենք չեն ցանկանում, որպեսզի հայոց բանակում հիվանդ զինվոր ծառայի, կամ ծառայության ընթացքում թեթև առողջական խնդիրն էլ ավելի բարդանա: Հարցին, թե հատկապես առողջական ի՞նչ խնդիրների դեպքում են զորակոչիկները դիմում իրենց՝ համարելով, որ զինկոմիսարիատը ճիշտ քննություն չի անցկացրել, տիկին Արմենակյանը պատասխանեց.
«Տղաները հիմնականում 1991 թվի ծնվածներ են՝ համալսարանը նոր ավարտած: Այդ տարիների հետևանքով՝ մոմի լույսի տակ գրել-կարդալու պատճառով, նրանց մոտ առաջացել են տեսողության հետ կապված խնդիրներ: Հիմնական բողոքը դա է: Նաև շատ են ողնաշարի հետ կապված խնդիրները, որոնք առաջանում են երթուղայինով կանգնած՝ ծռված երթևեկելու պատճառով: Իմ ունեցած տեղեկություններով` առ այսօր եղել է 65 դիմում-բողոք, որոնք բոլորն էլ պարտադիր ընթերցվում, հանձնաժողովի կողմից քննարկվում են: Նշեմ նաև, որ քննարկումը բաց է և՛ լրագրողների, և՛ զորակոչի ենթակա զինվորների ծնողների համար»:
Զրուցեցինք նաև ՀՀ պաշտպանության նախարարի խորհրդական, ՀՀ պաշտպանության նախարարին առընթեր հասարակական խորհրդի նախագահ Գեղամ Հարությունյանի հետ: Նա էլ իր հերթին նշեց, որ մինչև այսօր աշնանային զորակոչի հետ կապված ստացել են 78 դիմում-բողոք, որոնցից 70-ն արդեն ընթերցել են:
«Նախկինում շատ միջնորդություններ բավարարվել են: Բողոքի պատճառները տարբեր են: Դրանք առողջական վիճակի հետ կապված բողոքներ են. ծնողները կարծում են, թե իրենց որդին առողջական վիճակի պատճառով չի կարող ծառայել բանակում: Կան նաև այլ բողոքներ, օրինակ` ծառայության վայրի հետ կապված՝ եղբայրը ծառայում է մի զորամասում, մյուս եղբայրը զորակոչվում է, և խնդրում են, որպեսզի միասին ծառայեն՝ լինեն նույն զորամասում: Կամ ընտանեկան որոշ հանգամանքներ մեջբերելով` խնդրում են բնակության վայրին մոտ զորամաս ուղարկել: Դիմում-բողոքները տարբեր բնույթի են, բայց գերակշռող մասը կապված է առողջական վիճակի հետ:
Դիմումներն ընթերցելուց, քննարկելուց հետո՝ կախված նրանից, թե ինչ կարգի դիմում է, ուղարկում ենք համապատասխան վայր և համապատասխան մարդու: Շատ կարևոր հարցեր ներկայացնում ենք պաշտպանության նախարարության գլխավոր շտաբի պետին, իրավական հարցերի շուրջ՝ եթե հանձնաժողովը խորհրդատվության կարիք է զգում, ուղարկում ենք պաշտպանության նախարարի իրավաբանական վարչության պետին, առողջական խնդիրների հետ կապված՝ հանրապետական զինվորական կոմիսարի պաշտոնակատարին, որը միևնույն ժամանակ Կենտրոնական բժշկական հանձնաժողովի նախագահն է:
Եթե հանձնաժողովը դիմումն ընթերցելուց, քննարկելուց հետո գտնում է, որ այն արժանի է և պետք է բավարարվի ու հավելյալ քննարկվի, ապա ուղարկում ենք համապատասխան վայր: Կարող ենք նաև միջնորդել, որ ավելի հիմնավոր որոշում կայացնելու համար զորակոչիկին ուղարկեն լրացուցիչ բուժհետազոտության կամ կրկին քննարկեն նրա հարցը:
Մեր հանձնաժողովը ունի 11 անդամ: Քննարկվում ենք բոլորի ներկայությամբ, այդ թվում նաև՝ դիմում տվողի, զորակոչիկի, լրատվամիջոցների: Անպատասխան հարցերով մեզնից ոչ ոք չի հեռանում»,- ասաց Գեղամ Հարությունյանը:
