Թուրքական Milliyet թերթի փոխանցմամբ` Էներգետիկ շուկան կարգավորող հիմնարկը (EPDK) թուրքական 4 ընկերությունների արտոնել է ներկրել ռուսական գազ: Մասնավորապես, «Աքֆել», «Բոսֆոր գազ» և «Քիբար Էներժի» ընկերություններին 30 տարով թույլատրվել է ներկրել ռուսական գազ, իսկ «Բաթը Հաթթը» ընկերությանը՝ 23 տարով:
Ռուսական գազ ներկրելու արտոնագրի ստացման համար պայքարում էր թուրքական 13 ընկերություն: Արտոնագիր ստացած 4 ընկերությունները, ռուսական «Գազպրոմի» հետ նախապես ձեռք բերված պայմանավորվածության համաձայն, տարեկան 6 միլիարդ խորանարդ մետր գազ են ներկրելու «Արևմտյան» գազատարով, որը Ռուսաստանից հասնում է Թուրքիայի եվրոպական հատված:
Հիշեցնենք, որ նախորդ տարեվերջին թուրքական «Բոթաշ» և ռուսական «Գազպրոմ» ընկերություններին չհաջողվեց համաձայնության գալ ռուսական գազի գնի շուրջ, որից հետո թուրքական կողմը չերկարաձգեց Ուկրաինայի, Ռումինիայի, Մոլդովայի և Բուլղարիայի տարածքներով անցնող «Արևմտյան» գազատարի պայմանագրի ժամկետը, որը սպառվում էր նախորդ տարվա դեկտեմբերի 31-ին:
Մինչ այդ ծրագրված էր 23 տարով երկարաձգել 1986 թվականին 25 տարով կնքված պայմանագրի ժամկետը: «Արևմտյան» գազատարն ապահովում էր Թուրքիայի գազային կարիքների 15 տոկոսը, հիմնականում՝ մատակարարվում էր Ստամբուլի բնակչությանը:
