Պածեստինյան ՀԱՄԱՍ շարժումը դատապարտել է այսօր Գազայի հատվածում Իսրայելի կողմից արձակված կրակահերթը, ինչի հետևանքով զոհվել է մեկ, վիրավորվել մի քանի մարդ: Այս մասին հաղորդում է Reuters-ը:
Հիշեցնենք, ավելի վաղ հաղորդվում էր, որ 23 տարեկան տղամարդը սպանվել է գլխին ստացած կրակոցից, որն արձակել են իսրայելցի զինվորները, երբ նա մոտեցել է Իսրայելի և Գազայի հատվածի սահմանը պահպանող արգելապատնեշին: Սպանության պահին դեպքի վայրում եղած երիտասարդի հարազատներից մեկը հայտնել է, որ նա ցանկանում էր ՀԱՄԱՍ շարժման դրոշը տեղադրել ցանկապատի վրա:
ՀԱՄԱՍ-ի ներկայացուցիչ Սամի Աբու Զուհրին Իսրայելին մեղադրել է երկու օր առաջ կնքած հրադադարի խախտման մեջ և նշել, որ ՀԱՄԱՍ-ն այդ մասին տեղյակ կպահի Եգիպտոսին, որը հրադադարի կնքման գործում հանդես է եկել որպես ակտիվ միջնորդ:
Նշենք, որ իսրայելական կողմը Իսրայելի և Գազայի հատվածի սահմանը բազմիցս հայտարարել է պաղեստինցիների համար արգելված գոտի: Հրադադարի պայմաններով՝ կողմերը պարտավորվել են դադարեցնել ագրեսիան, սակայն մանրամասները, որոնք վերաբերում են սահմանային գոտուն, չեն հստակեցվել, և պետք է մշակվեն մոտ ժամանակներս:
