«Հայ ազգային կոնգրես» խորհրդարանական խմբակցության հրավիրած այսօրվա արտահերթ նիստն այդպես էլ չկայացավ՝ քվորումի բացակայության պատճառով: ՀՀԿ-ն, ինչպես որ խոստացել էր, չմասնակցեց նիստին, ինչը ՀԱԿ խմբակցության ղեկավար Լևոն Զուրաբյանը համարեց «Սահմանադրության բռնաբարում»:
«Պետք է հորդորեմ, որ իմ գործընկերները փողոցային, միտինգային բառապաշարից ձերբազատվեն և «Սահմանադրությունը բռնաբարել»-ը քիչ օգտագործեն: Եթե մի բան բռնաբարվել է, ապա իրենց կողմից՝ ժողովրդի վստահությունը, և այն բռնաբարելով՝ հասան խորհրդարան»,- «Հ2» հեռուստաընկերության «Խոսքի իրավունք» հաղորդման եթերում ասել է ԱԺ ՀՀԿ խմբակցության քարտուղար Հովհաննես Սահակյանը: Նա նշել է, որ Սահմանադրության որևէ կետ չի խախտվել. ընդդիմությունն օգտվել է իր սահմանադրական իրավունքից, հավաքել 44 ստորագրություն և հրավիրել արտահերթ նիստ, ՀՀԿ-ն էլ ասել է, որ չի մասնակցելու և բերել է փաստարկներ: «Մենք գտել ենք ոչ նպատակահարմար մասնակցել այս քննարկումներին, որովհետև սրանք անպտուղ են, քաղաքական շոու անելու անհաջող սցենար: Լուրջ փոփոխությունների ամար առնվազն 6 ամիս է պետք»,- ասել է Հովհաննես Սահակյանը՝ հավելելով, որ ժողովրդի անունից խոսողները ոչ միայն չկարողացան պատշաճ թվով քաղաքացիներ հավաքել ԱԺ-ի դիմաց, չնայած որ 2-3 օր միայն դա էին հայտարարում, այլև արտահերթ նիստի համար ստորագրած 44 պատգամավորներին ամբողջությամբ չկարողացան դահլիճ բերել:
Հովհաննես Սահակյանն ամենածանրը խորհրդարանում իրենց դրությունն է համարում. «Ժառանգությունը»՛ 5 հոգով 7 երգ են երգում, ՀԱԿ-ը՝ 7 հոգով՝ 12 երգ, մյուս խմբակցությունը դեռ չի էլ կողմնորոշվել, թե ինչ երգի»: Ամենադժվարը Հանրապետականի գործն է, որ պետք է բոլորի պահանջները բավարարի:
Անդրադառնալով ՀՅԴ խմբակցության հայտարարությանը, թե հանրապետականների այսրվա վարքագիծը պետք է քննարկման առարկա դարձնել ԱԺ էթիկայի հանձնաժողովում, Հովհաննես Սահակյանն ասել է. «Բոյկոտը, որպես քաղաքական դիրքորոշում, չի կարող լինել էթիկայի հանձնաժողովում քննարկման առարկա»:
