ՄԱԿ-ի տվյալներով՝ վերջին ժամանակներս նկատվում է ՄԻԱՎ-ՁԻԱՀ-ի վարակի զգալի նվազեցում ամբողջ աշխարհում, և վարակակիրների մեծ մասն անհրաժեշտ բուժում է ստանում։ Այս մասին հաղորդում է BBC-ն:
ՄԻԱՎ-ՁԻԱՀ–ի վարակի նվազեցումը, ՄԱԿ-ի տվյալներով, ամենամեծն է վարակի պատմության ընթացքում:
Վարակի նվազման ամենամեծ մակարդակը նկատվում է աֆրիկյան պետություններում, օրինակ՝ Մալավիայում ու Բոտսվանայում վարակների թիվը նվազել է ավելի քան 70 %-ով:
Միևնույն ժամանակ բուժծառայության որակն աստիճանաբար լավանում է, և այսօր վարակվածների գրեթե կեսն արդեն ստանում է անհրաժեշտ դեղորայքը:
Այնուամենայնիվ, ինչպես նշվում է հաղորդագրության մեջ, վարակակիրների միայն կեսին է ճիշտ ախտորոշում տրվել։ Վարակի մակարդակը շարունակում է բարձր մնալ Արևելյան Եվրոպայում, Հյուսիսային Աֆրիկայում և Մերձավոր Արևելքում:
