ԵՄ միասնական և 7 տարի ժամկետով բյուջեի վրա վետո դնելու Մեծ Բրիտանիայի սպառնալիքների պատճառով Բրյուսելում ԵՄ գագաթնաժողովը մեկնարկել է առանց Լոնդոնի: Այս մասին հայտնում է Financial Times-ը:
«2014-2020թթ. ԵՄ միասնական բյուջեի ընդունման տարբերակի շուրջ քննարկումը տեղի է ունենում ԵՄ բոլոր պետությունների մասնակցությամբ` բացառությամբ Մեծ Բրիտանիայի,- նշում է պարբերականը:- Պաշտոնատար անձինք խոստովանում են, որ նման քայլը ծանր հետևանքներ կունենա Լոնդոնի համար, որն առանց այդ էլ բավականին բարդ հարաբերություններ ունի ԵՄ երկրների հետ»:
Մեծ Բրիտանիայի վարչապետ Դևիդ Քեմերոնը դեռ մեկ ամիս առաջ էր նախազգուշացրել, որ Լոնդոնը վետո կդնի 7-ամյա բյուջեի վրա, եթե այն չսառեցվի ներկայիս մակարդակում, սակայն առանց գնաճի հաշվառման:
Եվրահանձնաժողովը ձգտում է միասնական բյուջեի ընդլայնմանը` ԵՄ ՀՆԱ-ի մինչև 1 տոկոս կամ մինչև 1.033 տրիլիոն եվրո:
Պարբերականի հաղորդագրությունը վկայում է այն մասին, որ ԵՄ մի շարք երկրներ այնքան կասկածամտորեն են վերաբերվում Լոնդոնի քաղաքականությանը, որ պատրաստ են հանել նրան ԵՄ միասնական բյուջեից և այդպիսով անել առաջին քայլը` ուղղված ԵՄ-ից Մեծ Բրիտանիայի հեռացմանը:
