Ռուսաստանի Պյատիգորսկ քաղաքում վերջնական խմբագրմամբ մեղադրանք է առաջադրվել ազգությամբ հայ Վլադիմիր Համբարձումովի դեմ, որը կասկածվում է 9-ամյա Աննա Պրոկոպենկոյի նկատմամբ սեռական բռնություն կատարելու, այնուհետև նրան սպանելու մեջ: Այս մասին հայտնում է Vesti-ն:
2012-ի ամռանն այդ գործը հասարակական մեծ արձագանք էր ստացել: Աղջկան մի քանի օր փնտրել էին ոչ միայն ոստիկաններն ու զինվորականները, այլև կամավորները: Քննության ընթացքում ի հայտ էին եկել Պյատիգորսկի մոլագարի կողմից իրականացված այլ հանցագործություններ ևս:
ՌԴ ՔԿ Ստավրոպոլի երկրամասի քննչական վարչությունում հաղորդում են, որ 40-ամյա Համբարձումովի դեմ առաջադրվել է մեղադրանք ՌԴ Քրեական օրենսգրքի՝ «Սեռական բնույթի բռնարարք», «Բռնաբարություն» և «Սպանություն» հոդվածներով:
Քննության տվյալներով՝ 2012-ի հուլիսի 23-ին Համբարձումովը փողոցում հանդիպել է աղջկան, ներկայացել որպես կոսմետիկական ընկերության առևտրային ներկայացուցիչ և նրան առաջարկել գումար աշխատել: Այդ նպատակով նա աղջկան առաջարկել է իր հետ գնալ գրասենյակ, սակայն նրան տարել է անտառ, որտեղ բռնաբարել է և նրա հանդեպ կատարել սեռական բնույթի բռնի գործողություններ: Այնուհետև Համբարձումովը խեղդել է աղջկան և նրա մարմինը թաքցրել անտառում՝ ծածկելով թերթաքարով:
Օգոստոսի 1-ին հանցագործության կասկածանքով 40-ամյա Համբարձումովը ձերբակալվել է: ԴՆԹ փորձաքննությունը հաստատել է աղջկա սպանության մեջ նրա մասնակցությունը:
Քննության ընթացքում ի հայտ են եկել Համբարձումովի հանցավոր գործունեության հավելյալ փաստեր: Մասնավորապես, 2012-ի հուլիսի 3-ին նա Պյատիգորսկում երիտասարդ կնոջ է բռնաբարել, իսկ 2004-ի սեպտեմբերին (սանհանգույցում կոյուղաջրերի արտահոսքի հետ կապված օգնության ցուցաբերման առաջարկով), կրկին Պյատիգորսկում, մտել է բազմաբնակարան շենքերից մեկի բնակարաններից մեկն ու բռնաբարել տանը առանց ծնողների եղած 12-ամյա աղջկան:
Ներկայում իրականացվում են քննչական և դատական այլ գործընթացներ՝ ուղղված նախաքննության ավարտմանը՝ հաղորդում է ՌԴ Քննչական կոմիտեն:
Ավելի վաղ Համբարձումովին մերժել են քննության հետ համագործակցել: Մինչդատյա համաձայնությունը կնշանակեր, որ դատարանում գործի քննության ժամանակ ամբաստանյալին չպետք է նշանակվեր մեղադրական ամենածանր հոդվածի առավելագույն պատժաչափի 2/3-ից ավելին:
