«Լրագրողներ առանց սահմանների» կազմակերպությունը քննադատել է Գազայում 2 մեդիակենտրոնների հրթիռակոծումը, որոնց հետևանքով 6 պաղեստինցի լրագրող է վիրավորվել և վնասվել է արտասահմանյան ԶԼՄ-ների տեխնիկան, փոխանցում է Associated Press-ը:
Երկու շենքերի վրա այսօրվա հարվածները վնաս են հասցրել «Համասա», «Ալ-Ակսա» և «Ալ-Քուդս Թիվի» հեռուստաալիքներին, որոնք համակրում են իսլամիստներին: Անգլերենով հեռարձակող Russia Today և Sky News Arabia, գերմանական ARD հեռուստաընկերությունները հայտնել են, որ իսրայելական հարձակումների հետևանքով կորցրել են իրենց սարքավորումները:
Փարիզում գործող «Լրագրողներ առանց սահմանների» կազմակերպության տնօրեն Քրիստոֆեր Դելուարը նշել է, որ հարձակումները հիմնավորված չեն եղել և վտանգում են տեղեկատվության ազատությունը: Նա կոչ է արել հետաքննել հարվածների բոլոր մանրամասները:
Իսրայելցի զինվորականները հայտնել են, որ հարվածները նպատակաուղղված են եղել շենքերի տանիքներին տեղադրված կապի սարքավորումներին:
Հիշեցնենք, որ նոյեմբերի 14-ին Իսրայելը Գազայի հատվածում իրականացնում է «Ամպե սյուն» գործողությունը, որի նպատակն է ոչնչացնել զինյալներին և նրանց ինֆրակառուցվածքները:
