«Հայաստան» համահայկական հիմնադրամն ամեն տարի հեռուստամարաթոն է կազմակերպում: Այս տարի այն կանցկացվի նոյեմբերի 22-ին:Հիմնադրամից տեղեկացանք, որ այս անգամ հավաքված ամբողջ գումարը ծախսվելու է Արցախում հիվանդանոցներ, բուժկետեր և այլ նմանատիպ հաստատություններ բացելու համար. «Եթե բարերարներիցորևէ մեկն ուզենա կոնկրետ այլ բանի համար գումար փոխանցել, ապա մենք գումարը կծախսենք նրա ցանկությունը հաշվի առնելով»,- «Առաջին լրատվական»-ի հետ զրույցում նշեց Հիմնադրամի աշխատակից Գևորգ Գևորգյանը:
Խոսելով Հիմնադրամի գործունեության մասին` դրամատուրգ, մշակույթի նախկին փոխնախարար Կարինե Խոդիկյանը նշեց, թե ցավալի է, որ 22 տարվա անկախության պատմություն ունեցող պետությունը ձեռքը պարզած գումար է խնդրում.«Անկախության արդեն 22-րդ տարին է, և տրամաբանորեն Հայաստանը պետք է այն աստիճանի ինքնուրույն իր ոտքերի վրա կանգնած լիներ, հայրենիքի զգացողություն ունենար, որ ձեռքը պարզած հույս չունենար, թե դրսից ով ինչքան փող է տալու, որ ինքն իր երկիրը կառուցի կամ պահի: «Հայաստան» համահայկական հիմնադրամի գործունեությունը շատ կարևոր էր պատերազմի տարիներին, անհրաժեշտ էր, որովհետև ինքներս չէինք կարողանում ոտքի վրա կանգնել: Ես կարծում եմ, որ մի պետություն, որ 22 տարի է իբր անկախ է ու իր հույսը դրել է, որ դրսից պետք է փող ստանա, որ ինչ-որ բարի գործ անի, այստեղ արդեն կամաց-կամաց մարաթոն կազմակերպելը փոխվում է գումար խնդրելու լացի»,-եզրափակեց Կ. Խոդիկյանը:
