Սիրիայում պատերազմի պատճառով Հայաստան եկած Սարգիս Օլխաջի և Վարդինե Նազարյան ամուսինները ՀԲԸՄ-ից ստացան 60.000 դրամ օգնություն: Այս մասին «Առաջին լրատվական»-ի հետ զրույցում ասաց Սարգիս Օլխաջին։
«Սիրիայում տեղի ունեցող իրադարձությունների պատճառով ստիպված էինք վերադառնալ Երևան: Այստեղ բավական դժվար է, քանի որ չունենք բնակարան: Ապրելու, գոյատևելու համար անհրաժեշտ է նաև աշխատանք: Քանի որ այնտեղ ընթացող պատերազմը դեռ երկար կտևի, ուզում ենք մշտական հաստատվել Հայաստանում: Տեղեկացանք, որ այստեղ գործում է սիրիահայերին աջակցող ՀԲԸՄ-ը: Դիմեցինք կազմակերպությանը, նրանք նշեցին, որ երբ անհրաժեշտ տվյալները հանձնաժողովը քննի, մենք կստանանք օգնություն: Մոտ մեկ ամիս անց ստացանք 60.000 դրամ, որը գոնե ինչ–որ չափով մեզ օգտակար եղավ: Այնտեղից եկել ենք ամառային շորերով, իսկ այստեղ արդեն գրեթե ձմեռ է»,- պատմեց Սարգիսը:
ՀԲԸՄ սիրիահայերի հարցերով հանձնաժողովը վճարում է սիրիահայերի բնակարանների վարձի մի մասը՝ ամսական 40 000-60.000 դրամ։ Գումարի չափը պայմանավորված է ընտանիքի անդամների թվով: Կազմակերպության հանձնաժողովը գումարի չափը պայմանավորում է ընտանիքի անդամների թվով: 40.000 դրամը տրվում է մեկ անձի, 60.000 դրամը` մի քանի անձից բաղկացած ընտանիքի: Չեն վճարում միայն նրանց, ովքեր Երևանում տուն կամ լավ աշխատանք ունեն: Եթե ընտանիքի որևէ անդամ աշխատանքով ապահովված է, բայց վաստակած գումարը քիչ է, չի բավականացնում, հանձնաժողովի որոշմամբ նրանց ևս վճարվում է։
