Վերաքննիչ քրեական դատարանում շարունակվեց Հարսնաքարի գործով բերված վերաքննիչ բողոքների քննությունը:
Տուժող կողմն իր ներկայացուցիչներով դարձյալ բացակայում էր:
Ամբաստանյալ Արման Խաչատրյանի բողոքը ներկայացրեց պաշտպան Երեմ Սարգսյանը:
Շատ դրույթներ կրկնվում էին՝ մեղադրանքի՝ չկոնկրետացված, պատիժների՝ չանհատականացված լինելու մասերով:
Պաշտպանն ասաց, թե Արման Խաչատրյանին առաջադրված մեղադրանքի հիմքում դրված են ենթադրությունների մակարդակի ապացույցներ: Խախտվել է անմեղության կանխավարկածի սկզբունքը:
Ընդհանուր իրավասության դատարանում դատաքննության ավարտական փուլում վրա է հասել մի պահ, երբ, ըստ պաշտպանի, «լրատվամիջոցներով ճնշում գործադրվեց, որ հեսա՝ տեսեք, մարդիկ են ազատվելու, պատիժը մեղմ է լինելու…»: Բայց հրապարակվել է դատավճիռն ու պարզվել է, որ «էս հոդվածներով նման ծանր պատիժ առաջին անգամ է նշանակվել»:
Արման Խաչատրյանի և Արման Բաղդասարյանի դեմ, ըստ Երեմ Սարգսյանի, ոչ մի ապացույց չկա,« խղճի դեմ է, որ նրանք դատապարտվեն չարած արարքների համար»:
Պաշտպանը միջնորդեց բեկանել ընդհանուր իրավասության դատարանի դատավճիռը, դադարեցնել Արման Խաչատրյանի քրեական հետապնդումը, նրան ճանաչել անմեղ ու արդարացնել:
Արման Խաչատրյանը մասնավորապես ասաց. «Մեղադրանքն իմ համար բացարձակ անհասկանալի է, չեմ հասկացել՝ ում գործողությունների համար եմ դատվել, կոնկրետ ում եմ ես վնաս հասցրել…
Անտրամաբանական որոշում է կայացրել դատարանը՝ ամբաստանյալների խոստովանական ցուցմունքները ճանաչելով ոչ արժանահավատ…
Տուժողները մի քանի ցուցմունք են տվել, ամեն տեղ մի բան են ասել՝ մեկը մյուսից տարբերվող, բայց նրանց ցուցմունքները համարվել են արժանահավատ…
Տուժողների ցուցմունքները կախված էին դրսում տիրող տրամադրությունների հետ, դրսում մթնոլորտը թեժանում էր, սկսում էին ցուցմունք տալ, թե բոլորը հարվածել են իրենց… Եթե ընդեղ է եղել , ուրեմն մասնակցել է. սա է դարձել տուժողների սկզբունքը: Չեն ասել՝ կոնկրետ ով է եղել հարվածողը, որ մեղադրանքը չտարանջատվի…
Ո՞նց ա հնարավոր, որ մարդուն ընկած վիճակում հարվածներ հասցնեն ու վնասվածք չստանա, իմ չորս տարեկան տղան էլ ընկածին հարվածի ոտքերով, վնասվածքներ կհասցնի: Էդգար Նիկոյանին ընկած վիճակում հարվածներ հասցնելու դեպքում նա վնասվածքներ կստանար, չստանալն անհնար է:
Միակ հնարավոր բանն այն է, որ էդ մարդն ընդհանրապես չի խառնվել, քանի որ իմ հետ հանգիստ կանգնած է եղել, դրա համար առերեսման ժամանակ ասել է, որ ինձ կռվի ժամանակ տեսել է հանգիստ կանգնած վիճակում: Հետո դրսի տրամադրությունների տակ է ընկել ու սկսել է փոխել ցուցմունքները…
Դատավճիռը խայտառակություն է, խնդրում եմ բեկանել, նման բան չի կարող լինի, ես տասներկու տարի ազատազրկման եմ դատապարտվել՝ առավոտյան գործի գնալու համար, ցանկացած մարդ էլ կարող է գնա աշխատանքի ու ընկնի նման պատմության մեջ»:
Տուժողներն ու նրանց ներկայացուցիչները դատական նիստին ներկա չէին, մինչդեռ արդեն հերթը նրանցն էր՝ իրենց բողոքը ներկայացնելու, ամբաստանյալների ու նրանց շահերի պաշտպանների հիմնավորումները դատարանն արդեն լսեց: Խոսք գնաց, որ տուժողների ներկայացուցիչները բացակայում են հանրապետությունից:
Պաշտպան Մարինե Թովմասյանն ասաց՝ տուժողների ներկայացուցիչները բողոք են ներկայացրել, թող բարի լինեն ներկայանալ ու ներկայացնել իրենց բողոքը, որ հետո չմեղադրեն պաշտպանական կողմին, ու էս հանգամանքը հետագայում չշահարկեն…
Դատարանը որոշեց նախ բոլոր բողոքները լսել, նոր անցնել պատասխաններին: Այսինքն, դատական նիստը հետաձգել, հաջորդ նիստին լսել տուժողների ներկայացուցիչների վերաքննիչ բողոքի հիմնավորումները:
Հաջորդ նիստը տեղի կունենա հունիսի 11-ին:
