Սպառողների միության ՀԿ նախագահ Արմեն Պողոսյանը կարծում է, որ մեր տնտեսությունը ֆիզիկապես ոչնչացված է: Այսօր լրագրողների հետ հանդիպմանը նա նշեց. «Այդ ո՞ր հիվանդ գլխում առաջացավ «Նաիրիտ»-ը փակելու գաղափարը, դա անտրամաբանական էր, անթույլատրելի. դիտավորյալ ոչնչացրին մեր տնտեսությունը: Տնտեսությունն այժմ շատ վատ ցուցանիշներ ունի: Ի՞նչ ենք մենք արտադրում` բացի սննդից, իհարկե` ոչինչ»:
Անդրադառնալով վերջին շրջանում հայտնաբերված սիբիրախտի դեպքերին` Ա. Պողոսյանը նկատեց. «Ես ունեմ այնքան ինֆորմացիա սիբիրախտի մասին, որքան հրապարակվել է մամուլում: Սիբիրախտը սարսափելի հիվանդություն է և երկրորդն է` չումայից հետո: Բոլոր նմանատիպ խնդիրները հասարակական և պետական մարմինների համագործակցությամբ պետք է լուծվեն: Մինչդեռ ես այդ մասին իմանում եմ մամուլից, ինչը արդեն նորմալ չէ: Մեր մասնակցությունը միայն օգուտ կարող է բերել: Մենք լիարժեք չենք համագործակցում :
Բոլոր պետական մարմիններում ստեղծված են հասարակական խորհուրդներ, բայց իրենց կարծիքով` եթե ցուցանակ են կպցնում, ուրեմն փոխվում է ոճը` էլի գերատեսչական շահեր են հետապնդում, իսկ դա ենթադրում է, որ քիչ ինֆորմացիա դուրս կգա: Մեր խնդիրը ոչ թե պատճառները բացահայտելն է, այլ առողջապահության նախարարությունից ինֆորմացիա ստանալը:
Պանրի մեջ հայտնաբերված ցուպիկի խնդիրը մենք քննարկել ենք սննդի պետական ծառայությունում և քաղաքապետարանում: Մշակել ենք համատեղ ուսումնասիրության պլան, իսկ հասարակական կազմակերպությունը ստուգում անցկացնելու իրավունք չունի, և անկեղծ ասած` ցանկություն էլ չունենք: Այն, որ վերլուծել են, բացահայտել՝ շատ լավ է: Բայց, որպես կանոն, փոքրերն են հայտնվում պատժամիջոցի տակ: Թվով տասնութ կազմակերպություններ այս պատճառով տուգանվել են, սակայն տուգանելը նպատակ չէ: Դա չի նշանակում, թե խնդիրը վերացավ: Պետք է լինեն պրոֆիլակտիկ միջոցառումներ: Բոլորին պատժում են նույն կերպ, նույն չափով, իսկ դա նշանակում է մեծերին հարստացնել, փոքրերին սնանկացնել: Նույն գումարով պատժելը անընդունելի է»:
Պատասխանելով այն հարցին, թե որ կուսակցության տնտեսական ծրագիրն է ընդունելի իր համար, Արմեն Պողոսյանն ասաց. «Դժվարանում եմ այդ հարցին պատասխանել, բայց ավելի շատ «Ժառանգության» տնտեսական քաղաքականության ծրագրի կողմնակիցն եմ: Այնտեղ կան ձևակերպումներ, որոնք խիստ և վճռական գործողությունների են տանում: Հանրապետական կուսակցության ծրագիրն, իհարկե, ավելի ուժեղ է, բայց չի նշանակում, թե ավելի արդյունավետ է, որովհետև ժամանակն անցնում է, իսկ մենք փոփոխություն չենք տեսնում:
Մեր երկրում հողի և պետական գույքի սեփականաշնորհումը դրական արդյունք տվեց Լևոն Տեր-Պետրոսյանի ժամանակ, բայց դա դեռ չի նշանակում, թե ես կողմ եմ Լևոն Տեր-Պետրոսյանի քաղաքականությանը, պարզապես ժամանակը համընկավ»:
