Կառավարությունն այսօր որոշեց հետաձգել խոշոր տնտեսվարողների մոտ նոր ՀԴՄ-ների ներդրման ժամկետը: Կառավարության ավելի վաղ ընդունած որոշումներից մեկով` 2013 թվականի հունվարի 1-ից խոշոր տնտեսվարողները նոր ՀԴՄ-ներ պետք է տեղադրեին:
ՊԵԿ փոխնախագահ Վախթանգ Միրումյանը լրագրողներին տեղեկացրեց, որ տեղադրման ժամկետները երկարաձգվել են մինչև 2013 թվականի հուլիսի 1-ը, որպեսզի գործընթացը սահուն լինի: Հետաձգման լուրջ խնդիրներ, ըստ Միրումյանի, չկան, պարզապես նոր չափանիշներին համապատասխան ՀԴՄ-ներ պետք է ներկրվեն Հայաստան, ինչը ժամանակ է պահանջում:
Միաժամանակ տեղեկացվեց, որ կստեղծվի նոր պետական ոչ առևտրային կազմակերպություն, որն էլ կիրականացնի նոր ՀԴՄ-ների տեղադրման աշխատանքները:
