Հիմնական խնդիրը եվրոպական ընտրության հասարակական պահանջ ստեղծելն է: Այսօր «Եվրոպական ընտրություն» նախնական անվանումը կրող նախաձեռնության աշխատանքային հավաքի ժամանակ այս մասին ասաց ԱԱԾ նախկին ղեկավար Դավիթ Շահնազարյանը:
Նա նշեց, որ ողջունում է նախաձեռնությունն ու այն, որ հավաքը կայանում է ըստ էության հայտնի օրակարգով, քանի որ, նրա խոսքով, ՀՀ-ում մոդայիկ է դարձել հավաքվել ու ամիսներ շարունակ ստեղծել օրակարգ:
Դավիթ Շահնազարյանը ողջունեց նաև նախապես կազմված փաստաթուղթը: Նրա կարծիքով՝ ներկայում հեշտ չէ թեկուզ մեկ էջանոց փաստաթուղթ ստեղծել, բավական լավ փաստաթուղթ է:
Անդրադառնալով հասարակական պահանջի մասին խոսակցություններին՝ նա ասաց, որ հիմնական խնդիրը եվրոպական ընտրության հասարակական պահանջ ստեղծելն է, հասարակական պահանջի ներքո պետք է դադարեցվի այն գործընթացը, որի սկիզբը պաշտոնապես դրվել է սեպտեմբերի 3-ին՝ ռուսական ինտեգրացիոն կառույցներին անդամակցելու:
«Համագործակցության դաշտ կա այն միավորների հետ, որոնք «ոչ ոչ» -ի կողմնակիցն են, կարևոր է, որ այդ միավորները չլինեն քրեաօլիգարխիկ քաղաքական համակարգի մաս: Ողջունում եմ»,- նշեց նա՝ հավելելով, թե ճիշտ կլինի համակարգող խորհուրդ ստեղծել, քանի որ հսկայական աշխատանք կա կատարելու՝ կա քաղաքական բանտարկյալների հարց՝ Շանթ Հարությունյանը և նրա ընկերները, Վոլոդյա Ավետիսյան. քաղաքական դաշտը դրանով չի ցանկանում զբաղվել:
«Առաջարկում եմ այդ ճանապարհով շարժվել: Որոշակի հարցերի շուրջ կազմակերպվեն կլոր սեղաններ, սեմինարներ: Կարևոր է դա»,- ասաց Դավիթ Շահնազարյանը:
