Ամերիկյան հրթիռակիրների համար ռուսական RD-180 հրթիռային շարժիչների մատակարարման դադարեցումը ԱՄՆ-ին կհասցնի 5 մլրդ դոլարի վնաս: Այս մասին գրում է ITAR-TASS-ը:
Նման եզրակացության են հանգել ԱՄՆ պաշտպանության նախարարության պատվիրած զեկույցում՝ մի շարք փորձագետների ղեկավարությամբ:
Զեկույցում նշվում է, որ առաջիկա տարիներին ծրագրված է Atlas ամերիկյան հրթիռների 38 թողարկում, սակայն ԱՄՆ-ը դրանց թողարկման համար այժմ ունի միայն 16 ռուսական շարժիչ: Ըստ ռուսական «Էներգոմարշ» ընկերության հետ պայմանագրի՝ մինչև 2014-ի ավարտը պետք է իրականացվի ևս 5 շարժիչի մատակարարում: Սակայն եթե Ռուսաստանը հետագայում հրաժարվի մատակարարումից, ապա Atlas հրթիռների թողարկումը կդադարեցվի: Այս «լավատեսական սցենարի» դեպքում երկու տարվա ընթացքում կդադարեցվի 9 թողարկում՝ հասցնելով 2.5 մլրդ դոլարի վնաս: «Վատատեսական սցենարը» նախատեսում է 3.5 տարվա ընթացքում 31 թողարկման դադարեցում և 5 մլրդ դոլարի վնաս:
