Այսօր նախկին Հարավսլավիայի ռազմական հանցագործությունների միջազգային տրիբունալում հանդես կգա բոսնիացի սերբերի նախկին հրամանատար Ռատկո Մլադիչի պաշտպանությունը: Մլադիչին մեղադրում են ռազմական հանցագործությունների և մարդկության դեմ հանցագործությունների մեջ: Այս մասին հայտնում է BBC-ն:
Մեղադրյալի փաստաբանները պնդում են, որ Մլադիչը պարզապես հրամաններ է կատարել: Դատախազի վարկածով՝ Մլադիչն անմիջական կապ է ունեցել Բոսնիայի և Հերցեգովինայի մուսուլման բնակչության էթնիկ զտումների հետ:
Մլադիչի դեմ 19 հոդվածով մեղադրանք է առաջադրվել, որոնցից լրջագույնն առնչվում է Բոսնիայում պատերազմի ամենաարյունալի դրվագներից մեկին՝ 1995-ին Սրեբրենիցայում հազարավոր բոսնիացի տղամարդկանց ու դեռահասների սպանությանը:
Հունվարին գեներալ Մլադիչը հրաժարվել էր Հաագայում ցուցմունք տալ բոսնիացի սերբերի նախկին առաջնորդ Ռադովան Կարաջիչի դեմ: Մլադիչը դատարանն անվանել էր «սատանայական»՝ ասելով, որ իր տված ցուցմունքները կարող են հանգեցնել նրան, որ իր սեփական գործը դիտարկվի կողմնակալ:
