Մյունխենի «Բավարիա»-ի գլխավոր մարզիչ Պեպ Գվարդիոլան Չեմպիոնների լիգայի գավաթի խաղարկության կիսաեզրափակչի Մադրիդի «Ռեալ»-ի դեմ պատասխան խաղից առաջ հանդիպել է լրագրողների հետ: Հիշեցնենք` կողմերի առաջին մրցավեճում, որը կայացել է Մադրիդում, 1:0 հաշվով հաղթել է «Արքայական ակումբ»-ը:
«Իհարկե, լարված մթնոլորտ է լինելու: Մենք «Բավարիա»-ն ենք, և մենք կիսաեզրափակչում ենք: Ես ուրախ եմ առաջիկա խաղի հետ կապված: Վաղը հիանալի մթնոլորտ է տիրելու, և մենք անհամբերությամբ ենք սպասում խաղին: Ես միշտ էլ իմացել եմ, թե որքան ուժեղ է «Ռեալ»-ն ու ինչպիսի մեծագույն ֆուտբոլիստներ են այնտեղ խաղում:
Ֆրանկ Ռիբերին շատ կարևոր է մեզ համար: Այդ ֆուտբոլիստը մեզ շատ է անհրաժեշտ: Ես ուրախ կլինեմ, եթե նա խաղա բարձր մոտիվացիայով: Երբեմն զայրույթը ծառայում է նրա օգտին: Չեմ կասկածում, որ նա վաղը կցուցադրի իր ամբողջ ներուժը: Ռիբերին «Բավարիա»-ի պատմության մեծագույն խաղացողներից մեկն է:
Մենք ցանկանում էինք հյուրընկալվելիս գոլ խփել: Այժմ պետք է միայն գրոհենք, քանի որ այլ ելք չունենք: Բայց չպետք է մոռանանք նրանց հակագրոհների մասին: Երբ կիսաեզրափակչում ես, արդեն քեզ մոտ ես զգում եզրափակչին: «Ռեալ»-ն առաջին խաղում ապացուցեց, որ մոտ է եզրափակչին: Վաղը մեզ պետք է երկրպագուների աջակցությունը, նրանք պետք է օգնեն մեզ: Մենք ընդունակ ենք դուրս գալու եզրափակիչ: Դա ցանկանում են նաև մեր երկրպագուները: Չեմ կասկածում, որ նրանք վաղն իրենց բարձրության վրա կլինեն»,- Գվարդիոլայի խոսքերը մեջբերում է ՈՒԵՖԱ-ի պաշտոնական կայքը:
