ՄԱԿ-ի գլխավոր քարտուղար Պան Գի Մունը պարգևատրվել է Խաղաղության Սեուլյան մրցանակով: Պարգևը նրան հանձնվել է հունիսին կանանց և երեխաների իրավունքների համար պայքարում ունեցած ներդրման, ինչպես նաև զարգացող պետություններում աղքատության ոչնչացման ջանքերի համար:
«Ինձ համար մեծ պատիվ է պարգևատրված լինել Խաղաղության Սեուլյան մրցանակով»,- հայտարարել է ՄԱԿ-ի գլխավոր քարտուղարն այսօր Հարավային Կորեայի մայրաքաղաքում տեղի ունեցած հանդիսավոր արարողության ժամանակ:
Ինչպես ընդգծել է Պան Գի Մունը, նա դարձել է առաջին կորեացին, ով նման հեղինակավոր պարգևի է արժանացել, և դա պահն առավել հուզումնալից է դարձնում:
Խաղաղության Սեուլյան մրցանակ սկսել են շնորհել 1990 թվականից՝ ի հիշատակ 1988 թվականին Սեուլում տեղի ունեցած Օլիմպիական խաղերի: Այն ամեն տարի շնորհվում է քաղաքական գործիչների, ակադեմիկոսների և քաղաքացիական իրավունքի համար մարտիկներին: Նրանց շնորհվում է պատվոգիր, դիպլոմ և 200 հազար դոլար պարգևատրում: Ինչպես հաղորդել է Պան Գի Մունը, այդ միջոցները նա կբաժանի ՄԱԿ երկու ֆոնդերի միջև`զոհված գործընկերների և հաշտության միջնորդական ջանքերի համար: Նախորդ տարիներին Խաղաղության Սեուլյան մրցանակի դափնեկիր է եղել ՄԱԿ-ի նախկին գլխավոր քարտուղար Քոֆի Անանը, Նոբելյան մրցանակի դափնեկիր Մուհամմեդ Յունուսը: