Հոկտեմբերի վերջին Ֆրանսիայում սկսված անակնկալ ցուրտ եղանակի պաճառով երեք մարդ անհետ կորած է համարվում: Այս մասին հայտնում է AFP-ն:
Հանգստյան օրերին Փարիզում ջերմաչափի սնդիկի սյունը հասել է 2,3 աստիճան ցելսիուսի: Սովորաբար տարվա այս եղանակին Ֆրանսիայի մայրաքաղաքում ջերամաստիճանը 7 աստիճան է լինում:
Փարիզում անտուն թափառական է անհետ կորել, որին փրկարարներն արդեն մահացած են համարում: Ֆրանսիայի հարավ-արևելքում՝ Վար դեպարտամենտում անհետ կորել է Մեծ Բրիտանիայի քաղաքացի 12-ամյա տղան: Հաղորդվում է, որ նա եղանակի վատթարացումից առաջ գնացել էր հեծանվով զբոսնելու: Տղայի որոնումը եղանակային վատ պայմանների պատճառով դադարեցվել է:
Նմանօրինակ հանգամանքներում Ֆրանսիայի հարավային Էրո դեպարտամենտում կորել է հողմասահքի (վինսերֆինգի) սիրահարը: Ուժեղ քամին նրան քշել է անհայտ ուղղութամբ: 26-ամյա երիտասարդի որոնումները նույնպես հաջողությամբ չեն պսակվել:
Նախօրեին քամու ուժգնացման պատճառով Մարսելի նավահանգստում նավերից մեկի խարսխի շղթան պոկվել է, և այն հարվածել է նավաշինարանին: Զոհերի մասին չի հաղորդվում:
Ուշեղ քամու պատճառով կիրակի հետաձգվել է Ֆրանսիայի առաջնության՝ Մարսել-Լիոն հանիպումը:
Կիրակի Գրենոբլի և մի քանի այլ քաղաքների փողոցներ ծածկվել են ձյան 25 սմ շերտով: Տեղումներն անակնկալի են բերել տեղացիներին:
Ավելի քան 50 հազար տուն մնացել է առանց էլեկտրականության: Ձյան ծանրությունից էլեկտրալարերը վնասվել են: Ֆրանսիական Ալպերի մի շարք շրջաններում կես մետրանոց ձնակույտեր են հայտնվել, ճանապարհները պատվել են մերկասառույցով: Ճանապարհները երթևեկության համար տեղ-տեղ փակ են: