Մի խումբ ամերիկացի բանտարկյալներ հայց են ներկայացրել դատարան` պահանջելով իրենց ապահովել ատամի թելով, որը, հայցվորների կարծիքով, բերանի խոռոչի հիգիենան պահպանելու ծայրահեղ անհրաժեշտ միջոց է:
Ըստ ձերբակալվածների` բանտի վարչակազմը մերժել է իրենց տրամադրել ատամի թել, ինչը խախտում է քաղաքացիական իրավունքը և վնասում առողջությանը:
Հայցվորները, որպես փոխհատուցում, պահանջում են 500 միլիոն դոլար:
Դրա հետ մեկտեղ վերջին տարիներին ատամի թելը բանտարկյալների կողմից կիրառվել է բանտային ռեժիմը խախտելու համար: Մասնավորապես, Տեխասում մի բանտարկյալը դրանով խեղդել էր մեկ այլ բանտարկյալի: Մերիլենդի, Իլինոյսի, Արևմտյան Վիրջինիայի նահանգներում բանտարկյալները կուտակել էին բավարար քանակությամբ ատամի թել` փախուստի նպատակով ճոպան հյուսելու համար:
Բանտապահների խոսքով` ամուր, սինթետիկ ատամի թելը շատ է գնահատվում բանտերում. այն կիրառվում է խեղդելու, փախուստի, թմրանյութերի փոխանցման և մի շարք այլ նպատակներով: Այդ պատճառով բանտապահներին շատ տարօրինակ է թվացել բանտարկյալների հայցը:
