Իրանական Press TV հեռուստաալիքի փոխանցմամբ՝ Իրանի խորհրդարանի արտաքին քաղաքականության ու ազգային անվտանգության խորհրդարանական հանձնաժողովի նախագահ Ալաեդդին Բորուջերդին նախընտրական կամպանիայի հնարք է որակել Սպիտակ տան ոչ վաղ անցյալի այն հայտարարությունը, թե Սպիտակ տունը պատրաստ է երկկողմանի բանակցություններ անցկացնել Իրանի հետ.
«Դրա նպատակը ԱՄՆ նախագահ Բարաք Օբամայի վերընտրման հնարավորությունների մեծացումն է: Սպիտակ տան կողմից բանակցությունների անցկացման հնարավորության հարցը Օբամայի քարոզչական կամպանիայի մասնիկն է՝ միտված քվեներ ներգրավելուն: Բարաք Օբամայի դիրքորոշումը բավականաչափ բարենպաստ չէ: Դրա համար էլ նա օգտագործում է բոլոր հնարավոր միջոցները՝ ընտրողների աջակցությունը ստանալու համար»:
Հիշեցնենք, որ հոկտեմբերի 23-ին Սպիտակ տան մամլո քարտուղար Ջեյ Քարնին հայտարարել էր. «Մենք բաց ենք Իրանի հետ երկկողմանի բանակցությունների անցկացման հնարավորությունը դիտարկելու համար: Սակայն ներկայումս մենք դա չենք պլանավորում և այդ մասին համաձայնության չենք եկել իրանցիների հետ»:
