Աֆղանստանում տեղակայված ֆրանսիական զորակազմը կարող է Իսլամական հանրապետությունը լքել նախատեսված ժամկետից՝ 2012-ի դեկտեմբերից շուտ: Այս մասին BMF TV-ին հայտնել է Ֆրանսիայի ԱԳ նախարար Լորան Ֆաբիուսը:
Նախարարը այց է կատարել Քաբուլ, որտեղ Աֆղանստանի ղեկավարության և երկրում Անվտանգության աջակցման միջազգային ուժերի հրամանատարության հետ քննարկել է երկրում ռազմաքաղաքական իրավիճակը:
«Մենք խոսում էինք դեկտեմբերի վերջի մասին, սակայն ես կարծում եմ, որ ամեն ինչ ծրագրվածից ավելի արագ տեղի կունենա»,- ասել է նախարարը:
Ֆաբիուսը հայտարարել է, որ այդ ժամկետից հետո Աֆղանստանում զինվորականներ դեռ կմնան, սակայն մարտական ստորաբաժանումներ այնտեղ այլևս չեն լինի: Մնացող զինվորականները, որոնց թիվը նա չի հստակեցրել, կզբաղվեն դեպի հայրենիք ռազամական տեխնիկայի վերատեղաբաշխմամբ և աֆղանական անվտանգության ուժերի մարզմամբ:
Ֆրանսիացիները պետք է Աֆղանստանից վերատեղաբաշխեն 14 մարտական ուղղաթիռ, ավելի քան 900 միավոր հրետանային տեխնիկա և ռազմամթերքով 1500 բեռնարկղ:
Ներկայում աֆղանական Կապիսա և Քաբուլ նահանգներում տեղակայված է մոտ 2500 ֆրանսիացի զինվորական: Մեկ տարի առաջ ֆրանսիական զորակազմի թվաքանակն Աֆղանստանում կազմում է 4000 մարդ:
Աֆղանստանում հակաահաբեկչական օպերացիայում Ֆրանսիան կորցրել է 88 զինվորական:
