«Արմավիան» վերսկսել է ծառայությունները՝ «Զվարթնոց» օդանավակայանի հետ ունեցած պարտքային նոր վեճից հետո, սակայն ավիափոխադրողի խոշոր բաժնետեր, գործարար Միխաիլ Բաղդասարովը դեռ մտադիր է ազատվել անեկամտաբեր ավիաընկերությունից: Այս հարցին անդրադարձել է Businessneweurope-ը:
«Արմավիայի» վաճառքի ծրագրերի մասին ընկերության ղեկավարությունը հայտարարել էր սեպտեմբերի վերջին՝ հերթական վեճի ընթացքում: Աղբյուրի հետ զրույցում «Արմավիայի» մամլո քարտուղարը հոկտեմբերի 12-ին հաստատել է, որ վաճառքի վերաբերյալ բանակցություններն ընթացքի մեջ են, սակայն հրաժարվել է մանրամասներ հաղորդել:
«Զվարթնոցի» ղեկավարությունը սեպտեմբերի 20-ին հայտարարել էր «Արմավիայի» չվերթների կասեցման մասին այնքան ժամանակ, քանի դեռ ավիափոխադրողը չի վճարել 5,3 միլիոն դոլարի պարտքը: Մարտին կողմերի միջև առաջացած վեճի պատճառով «Արմավիան» պարտավորվել էր մինչև սեպտեմբեր մարել պարտքը: «Արմավիայի» մամլո քարտուղարը bne-ին հայտնել է, որ թռիչքները վերսկսվել են՝ նոր համաձայնության ձեռքբերման արդյունքում:
Օդանավակայանն արդեն մի քանի անգամ դադարեցրել է չվերթների սպասարկումը: «Արմավիան» դժգոհում է «Զվարթնոցի» սպասարկման բարձր գներից:
Նախկինում շշուկներ էին տարածվել, թե «Զվարթնոցի» սեփականատեր, արգենտինահայ գործարար Էդուարդ Էռնեկյանը միտումնավոր կերպով է նման բարձր գներ սահմանել, որպեսզի ավիափոխադրողը սնանկանա՝ հնարավորություն տալով իրեն տիրանալու դրան:
Երբ Հայաստանի ազգային ավիափոխադրողը հայտարարեց, որ «Արմավիայի» պոտենցիալ գնորդների շարքում իտալական ըներություն կա, դա ենթադրությունների տեղիք տվեց, որ այդ ընկերությունը կարող է լինել Volare Air-ը, որը 2008 թվականից պատկանում է Էռնեկյանին:
Սակայն հոկտեմբերի 4-ին Երևանում կայացած գյուղատնտեսական ֆորումի ժամանակ Էռնեկյանը լրագրողներին հայտնել է, որ ավիաընկերությունը գնելու մտադրություն չունի:
