Սիրիայի հարցով ՄԱԿ-ի և ԱՊԼ-ի հատուկ պատվիրակ Լահդար Բրահիմին Սիրիայում 3000 հոգանոց խաղաղապահ ուժերի զորակազմ տեղակայելու ծրագիր է կազմել: Այս մասին գրում է Telegraph-ը:
Հրատարակության տվյալներով` ալժիրցի դիվանագետը, որը վերջերս է հատուկ բանագնացի պաշտոնում փոխարինել ՄԱԿ-ի նախկին գլխավոր քարտուղար Քոֆի Անանին, ուսումնասիրել է իրավիճակն ու պարզել, թե որ երկրներն են պատրաստ խաղաղապահներ ուղարկելու Սիրիա:
Բրահիմին Առաջին հերթին դիմել է այն պետություններին, որոնց ուժերը ներառված են իսրայելա-լիբանանյան սահմանի մոնիտորինգով զբաղվող UNIFIL զորակազմում: UNIFIL-ում մեծ ներդրում ունեն Գերմանիան, Ֆրանսիան, Իսպանիան, Իտալիան և Իռլանդիան:
Հաշվի առնելով Սիրիայում ապստամբների շարքերում իսլամիստների աճող ներկայությանը` բրիտանական և ամերիկյան ուժերը, ըստ ամենայնի, կբացառվեն խաղաղապահական գործողությանը մասնակցելուց: Որպես այլ պատճառ նշվում է նրանց մասնակցությունն Իրաքի և Աֆղանստանի տարածքում մարտական գործողություններին:
Բրահիմին կրկին մտադիր է մոտ ժամանակներս այցելել Սիրիա` փորձելու համոզել նախագահ Բաշար Ասադին կրակի դադարեցման հրաման տալու հարցում:
