Անգլիայի առաջնության 29-րդ տուրի վերջին խաղում Լոնդոնի «Չելսի»-ն հյուրընկալվեց «Բլեքփուլ»-ին:
Հաշվի առնելով լոնդոնցիների մարզավիճակն ու տանտերերի ոչ այնքան տպավորիչ խաղը վերջին տուրերում` կարելի էր ակնկալել, որ Անչելոտտիի սաները հեշտ հաղթանակ կտոնեն, սակայն ամեն ինչ այդքան էլ պարզ չստացվեց:
Առաջին խաղակեսն անցավ հավասար պայքարում: Երկու թիմերն էլ ավելի շատ ուշադրություն էին դարձնում պաշտպանությանը: 20 րոպե անցել էր, բայց Անչելոտտիի սաները ոչ մի վտանգավոր գրոհ չէին կազմակերպել, սակայն գոլ խփելու համար միշտ չէ, որ գրոհել է անհրաժեշտ. գոյություն ունի ստանդարտ դիրք և Ջոն Թերի: Հենց 20-րդ րոպեին հյուրերը ստացան անկյունային հարվածի իրավունք, որի իրացումից հետո «ազնվականներ»-ի պաշտպանության առաջատարը գլխի հարվածով բացեց հանդիպման հաշիվը: Առաջին խաղակեսի վերջնամասում «Բլեքփուլ»-ը շատ ավելի վտանգավոր էր գրոհում, սակայն Հոլլոույի սաների մոտ եզրափակիչ հարվածը չէր ստացվում:
Երկրորդ խաղակեսում նույնպես տանտերերը ոչնչով չէի զիջում ահեղ մրցակցին, սակայն 62-րդ րոպեին հանդիպման գլխավոր մրցավար Մայք Դինը շատ կասկածելի 11-մետրանոց նշանակեց նրանց դարպասին: Լեմպարդը սառնասրտորեն կրկնապատկեց հաշիվը: 4 րոպե անց նույն Լեմպարդը Կալուի հրաշալի փոխանցումից հետո խփեց իր թիմի երրորդ գնդակը: Հանդիպման վերջնամասն անցավ «Բլեքփուլ»-ի թելադրանքով: 86-րդ րոպեին նրանց անգամ հաջողվեց մեկ գնդակ ուղարկել Չեխի դարպասը, բայց ավելին անել չհաջողվեց:
Այս հաղթանակից հետո «Չելսի»-ն ունի 51 միավոր և ընդամենը 9 միավորով է ետ մնում առաջատար «Մանչեսթեր Յունայթեդ»-ից: Հաշվի առնելով այն փաստը, որ «ազնվականներ»-ը «կարմիր սատանաներ»-ից մեկ հանդիպում քիչ են անցկացրել, կարելի է վստահորեն ասել, որ «Չելսի»-ն միանում է չեմպիոնության համար պայքարին: