Վարդան Օսկանյանին անձեռնմխելիությունից զրկելու միջնորդության քվեարկությունը նախօրեին անցնում էր առերևույթ հանգիստ, սակայն ներքին լարվածությունը մեծ էր. միջանցքներում հազվադեպ երևացող, ՀՀԿ Գործադիր մարմնում «գորշ կարդինալի» համարում ունեցող Ռազմիկ Զոհրաբյանը բավականին նյարդային հետևում էր անցուդարձին, ԳՄ մնացյալ «ծերերի» հետ փորձում հասկանալ` մարտը տանո՞ւլ կտան, «դեմ» քվեարկողներ ՀՀԿ-ից կլինե՞ն: Ըստ «Հրապարակ»-ի` պոտենցիալ «դեմերը» չէին շտապում քվեարկել, խմբվել-կանգնել էին պատուհանի մոտ, զգում էին իրենց ուղղված հայացքները, ձև էին անում, թե իբր չեն նկատում, «անկաշկանդ» զրուցում էին: Հետո հատ-հատ գնացին քվեարկության:
Քոչարյանի խնամի Վալոդը` Վոլոդյա Բադալյանը, քվեարկելուց հետո միացավ «զոնը» նայող «ծերերին», ապացուցելու, որ ինքն էլ նրանցից մեկն է` հավերժ ՀՀԿ-ական: «Հանցագործը վերադառնում է այնտեղ, որտեղ «հանցանք է գործել»»,- չդիմանալով` շշնջաց «ծերերից» մեկը կողքինի ականջին: «Բոց հումորի» վրա երկուսով ժպտացին: Ի դեպ, որքան էլ ԲՀԿ-ն ու մյուս ընդդիմադիրներն աչալուրջ հսկել էին գործընթացը, որը բավականին «թափանցիկ» գնահատեց Տիգրան Ուրիխանյանը «Հրապարակ»-ի հետ զրույցում, մեկ տեխնոլոգիա, բոլոր դեպքերում, աշխատել էր. ձայները հաշվելիս քվեատուփը շուռ չէին տվել, ինչից էլ պարզվել էր, որ «դեմ» ձայները հիմնականում վերջում քվեարկողներինն է եղել:
