РИА Новости-ի փոխանցմամբ՝ Մոսկվայում հուսով են, որ Վրաստանի խորհրդարանական ընտրություններին հաջորդող փոփոխությունները Թբիլիսիին հնարավորություն կտան ձեռնամուխ լինել հարևանների հետ հարաբերությունների կարգավորմանը: Այս մասին այսօր հայտարարել է Ռուսաստանի ԱԳՆ-ի պաշտոնական ներկայացուցիչ Ալեքսանդր Լուկաշևիչը.
«Ռուսաստանում ուշադիր հետևել են Վրաստանի խորհրդարանական ընտրությունների նախապատրաստմանն ու անցկացմանը: Մենք ընտրությունների արդյունքները դիտարկում ենք որպես երկրի սոցիալ-տնտեսական դրությանը, երկրում մարդու իրավունքների և ժողովրդավարության վիճակին, ինչպես նաև Հարավային Կովկասի անվտանգության հարցերի շուրջ վրացական ներկայիս ղեկավարության վարած քաղաքականությանը ընտրողների տված գնահատական:
Ակնհայտ է, որ վրաց հասարակությունը քվեարկել է փոփոխությունների օգտին: Հուսով ենք, որ, վերջին հաշվով, դրանք Վրաստանին հնարավորություն կտան ձեռնամուխ լինել հարևանների հետ հարաբերությունների կարգավորմանը, կառուցողական և հարգալից հարաբերությունների ձևավորմանը: Ռուսաստանում, բնականաբար, կողջունեին իրադարձությունների այդպիսի զարգացումը»:
