Новости-Грузия-ի փոխանցմամբ՝ այսօր Վրաստանում ընթացող խորհրդարանական ընտրություններում ժամը 15.00-ի դրությամբ ընտրողների ակտիվությունը կազմել է 45.5 տոկոս: Այս մասին հատուկ ճեպազրույցի ժամանակ հայտարարել է Վրաստանի Կենտրոնական ընտրական հանձնաժողովի (ԿԸՀ) մամլո քարտուղար Էկա Ազարաշվիլին:
Նշվում է, որ Վրաստանի նախագահ Միխեիլ Սաակաշվիլին առավոտից հետևում է խորհրդարանական ընտրությունների ընթացքին: Քվեարկելուց հետո նա այդ նպատակով այցելել է երկրի մի շարք շրջաններ, այդ թվում նաև Քութայիս: Քութայիսում տեղաբնակների հետ հանդիպման ժամանակ Սաակաշվիլին հայտարարել է, որ ցանկանում է այս պատմական օրը սեփական աչքերով տեսնել շրջաններում:
Սաակաշվիլին հավելել է, որ այսօր լավ օր է, և մարդիկ բավական ակտիվ են՝ ընդգծելով, որ վրաց ժողովուրդը մշտապես հաղթում է, քանի որ չի վաճառվում գումարով և գիտակցում է, թե երբ է վրա հասնում իր հայրենիքի վճռական պահը:
