Կյուրասաոյի վարչապետ Գերիթ Սխոտեն համաձայնել է Նիդերլանդների իշխանությունների պահանջներին (կղզին պատկանում է Նիդերլանդներին) և հրաժարական տվել: Ինչպես հաղորդում է Associated Press-ը, ավելի վաղ նա հրաժարավում էր լքել պաշտոնը և բարիկադներ էր ստեղծել իր աշխատավայրում՝ իրեն փոխարինողին և նրա համախոհներին անվանելով դավադիրներ:
Կղզում ճգնաժամը սկսվել է օգոստոսի 3-ին,երբ Սխոտեի գլխավորած իշխող կուսակցությունը կորցրեց մեծամասնությունը խորհրդարանում: Դրանից հետո վարչապետը ցրեց օրենսդիր մարմինը և նշանակեց արտահերթ ընտրություններ, որոնք պետք է տեղի ունենան հոկտեմբերի 19-ին:
Սեպտեմբերի 13-ին օրենսդիրները Նիդերլանդների ներկայացուցիչ գեներալ-նահանգապետ Ֆրից Գուդգեդրագից պահանջեցին փոխել կառավարությունը: Պատգամավորների խնդրանքը շաբաթ օրն իրականացվեց:
Վարչապետը, իմանալով այդ պահանջի մասին, հրաժարվել է այն իրականացնել: Մի քանի համախոհների հետ բարիկադավորվելով սեփական աշխատասենյակում՝ նա ժամանակավոր վարչապետ Սթենլի Բետրիանին և նրա համախոհներին անվանել է դավադիրներ: Նա հեղաշրջման փորձի մեջ մեղադրել է ընդդիմությանը, որը, նրա խոսքերով, փորձել է ազդել ընտրական գործընթացի վրա: Նա նաև օգնության խնդրանքով դիմել է հարևան պետություններին, այդ թվում՝ Վենեսուելային:
Կիրակի սակայն Սխոտեն որոշում է կայացրել դադարեցնել բողոքի ակցիան և լքել է նստավայրը: Նախկին վարչապետի խոսքերով՝ այժմ ինքը պատրաստվում է կենտրոնանալ առաջիկա ընտրությունների վրա: Թե ինչն է նրան ստիպել ենթարկվել Ամստերդամին՝ չի հաղորդվում:
Գերիթ Սխոտեն Կյուրասաոյի վարչապետ է դարձել 2010 թ., երբ կղզին մասնակի անկախություն ստացավ Նիդերլանդներից:
