«Ալ-Ջազիրայի» անգլալեզու հատվածի աշխատակիցները դժգոհել են ղեկավարության այն պահանջից, որի համաձայն` իրենք ստիպված են եղել փոփոխության ենթարկել ՄԱԿ-ի Գլխավոր ասամբլեայի նիստի մասին տեսանյութը, ինչն էլ կասկածի տակ է առել հեռուստաալիքի քաղաքական անկախությունը, հաղորդում է The Guardian-ը:
Խոսքը սեպտեմբերի 26-ի տեսանյութի մասին է: Լրագրողները սյուժեի սկզբում տեղադրել էին ԱՄՆ նախագահ Բարաք Օբամայի ելույթը, սակայն վերջին պահին լրատվական բաժնի տնօրեն Սալեմ Նեգմը խնդրել է փոխել սյուժեն` խոսքը կենտրոնացնելով Քաթարի շեյխ Համադ բին Խալիֆա Ալ-Տանիի ելույթի վրա:
Լրագրողներն այդ փոփոխություններին դեմ են հանդես եկել, քանի որ շեյխի խոսքը, նրանց կարծիքով, առանձնահատուկ արժեք չէր ներկայացնում. նա կրկին քննադատել է Բաշար Ասադի ռեժիմը և արաբական երկրներին Սիրիա ներխուժելու կոչ արել: Չնայած լրագրողների բողոքներին` տեսանյութը վերախմբագրվել է, և Օբամայի ելույթը հայտնվել է վերջում: Դա աշխատակիցների դժգոհությունն է առաջացրել, քանի որ նախկինում հեռուստաալիքի և՛ արաբական, և՛ անգլիական ղեկավար հատվածները, թեև պատկանում էին Քաթարին, սակայն երբեք չեն միջամտել խմբագրական քաղաքականությանը:
«Ալ-Ջազիրայի» մամլո քարտուղարը բացատրել է, որ շեյխի ելույթը այդ օրը ցույց է տվել «նկատելի զարգացում», ուստի տեղադրված էր տեսանյութի սկզբում: Նա նաև ավելացրել է, որ Օբամայի ելույթը հեռուստաալիքը ցուցադրել է ուղիղ եթերով, իսկ Քաթարի առաջնորդի խոսքը հավասարակշռվել է Եգիպտոսի նախագահ Մոհամեդ Մուրսիի մեկնաբանություններով, որը Սիրիա ներխուժելու դեմ էր հանդես գալիս:
The Guardian-ը, սակայն, հաղորդում էր, որ Մուրսիի մեկնաբանություններն իրականում վերցված են եղել այլ հեռուստաալիքին տված հարցազրույցից. ՄԱԿ-ի Գլխավոր ասամբլեայում ներկա ղեկավարներից գրեթե ոչ մեկը առանձնապես ուշադրություն չէր դարձրել շեյխի ելույթին:
