Սփյուռքի նախարարությանը 2011 թ. բյուջեով հատկացվել է 453 մլն դրամ, որը 100%-ով չի ծախսվել: Այդ մասին այսօր Ազգային ժողովի գիտության, կրթության, մշակույթի, երիտասարդության և սպորտի հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում «ՀՀ 2011 թ. պետական բյուջեի կատարման մասին» տարեկան հաշվետվության ներկայացման ժամանակ հայտնեց սփյուռքի նախարար Հրանուշ Հակոբյանը՝ պարզաբանելով, որ թերակատարումը պայմանավորված է նոր հաստիքների նշանակումների ձգձգումներով, որի արդյունքում 95% է ծախսվել բյուջեն, նաև բոլոր ծրագրերն իրականացվել են գնումների համակարգով և ցածր գնի արդյունքում խնայողություններ են արվել:
Հ. Հակոբյանը նշեց, որ սփյուռքի հետ աշխատանքը ճիշտ կատարելու համար պետք են մասնագետներ, դրա համար պետհամալսարանում բացվեց Սփյուռքագիտության ամբիոն, ԳԱԱ արվեստի և գրականության ինստիտուտներում բացվեցին սփյուռքի բաժիններ, համագործակցում են «Նորավանք» գիտակրթական հիմնադրամի հետ:
«Մեր աշխատանքի հիմնական ուղղությունը համարում ենք երիտասարդությունը»,- հայտարարեց Հ. Հակոբյանը՝ նշելով, որ այդ ուղղությամբ ճանաչողական տարբեր ծրագրեր են իրականացրել:
Նախարարի խոսքով, իրենց գլխավոր ուղղություններից է համահայկական համաժողովների կազմակերպումը. մինչ այս 27 համաժողով է կազմակերպվել, իսկ մյուս տարի կկազմակերպվի առևտրաարդյունաբերական պալատների համաժողով:
