Չեմպիոնների Լիգայի խմբային փուլի շրջանակներում կայացած «Յուվենթուս»-ի հետ խաղից հետո «Չելսի»-ի գլխավոր մարզիչ Ռոբերտո դի Մատեոն գովեստի խոսքեր է հղել բրազիլացի կիսապաշտպան Օսկարի հասցեին, ով հեղինակել է լոնդոնյան ակումբի երկու գոլը:
«Հիանալի խաղ էր: Հաղթելու շանս ունեին երկու թիմերն էլ: Բայց կարծում եմ` ոչ-ոքին արդարացի արդյունք է: Իհարկե, մենք փոքր-ինչ հիասթափված ենք, քանի որ ընդամենը 1 միավոր ենք վաստակել: Գիտեինք, որ մեզ դիմակայում է բարձրակարգ ակումբ, որի կազմում բազմաթիվ բարձրակարգ ֆուտբոլիստներ են հանդես գալիս: Մի քանի սխալ գործեցինք, որոնցից օգտվեց հակառակորդը:
Շատ լավ հանդես եկավ Օսկարը: Նա արդարացրեց ակնկալիքները: Օսկարը տակտիկապես գրագետ էր գործում, ինչի արդյունքում երկու գոլ հեղինակեց: Երկրորդ գոլը պարզապես հիանալի էր: Օսկարը մեր թիմի առանցքային խաղացողն էր: Երջանիկ ենք, որ նա հանդես է գալիս մեր թիմի կազմում»,- դի Մատեոյի խոսքերը մեջբերում է ՈւԵՖԱ-ի պաշտոնական կայքը:
