«Ֆերարի»-ի ավտոարշավորդ Ֆերնանդո Ալոնսոն խոստովանել է, որ դժգոհ չէ իր`«Մաքլարեն»-ը 2007 թվականին լքելու որոշումից: Հիշեցնենք, որ այդ մրցաշրջանի ընթացքում իսպանացին տարաձայնություններ է ունեցել թիմի և Լյուիս Հեմիլթոնի հետ:
«Դա լավագույն որոշումն էր, որը ես կայացրել եմ իմ կյանքի ընթացքում: «Մաքլարեն»-ը ուժեղ թիմ է, սակայն վերջին տասնամյակում քիչ տիտղոսներ է նվաճել»,- հայտարարել է Ալոնսոն AS-ին տված հարցազրույցում:
Բացի այդ ավտոարշավորդը մեկնաբանել է նաև «Ֆորմուլա-1»-ի 2012 թվականի մրցաշրջանի ներկայիս դրությունը` նշելով, որ մրցակիցներից ունեցած 37 միավորի առավելությունը հանգստության պատճառ չէ:
«Իմ ունեցած առավելությունը մեծ չէ, մենք կարող ենք պարտվել առաջնությունում: Եթե ես վատ հանդես գամ առաջիկա մի քանի ավտոարշավներում, ապա մրցաշրջանը վատ ավարտ կունենա մեզ համար: Ամեն անգամ պետք է նոր միավորներ վաստակել, ոչ թե պահպանել առավելությունը»,- հայտարարել է իսպանացին:
Ալոնսոն իր գլխավոր հակառակորդն է համարում Լյուիս Հեմիլթոնին: