15-18 տարեկանները բարդ հոգեբանական շրջան են ապրում, իսկ էմոները հենց այդ տարիքի դեռահասներն են: Հոգեբան Ռուբեն Պողոսյանը ասուլիսի ժամանակ նշեց, որ այդ շրջանը ունի իր առանձնահատկությունները:
Դեռահասներն այդ շրջանում ներփակվում են, հեռանում մեծահասակներից և փնտրում իրենց հասակակիցներին:
Սակայն տարածված տեղեկությունները, թե էմոները մինչև 18 տարեկան դառնալը կատարում են ինքնասպանություն, Քայքայիչ պաշտամունքից տուժածների օգնության և վերականգնողական կենտրոնի նախագահ Ալեքսան Ամարյանի խոսքով, թյուր է:
Նրա տեղեկացմամբ, իրականում էմոները պետք է ինքնասպանության փորձ կատարեն, ոչ թե ինքնասպան լինեն:
Ալեքսան Ամարյանը նշեց, որ Հայաստանում Էմոների մեկ տոկոսն էլ ինքնասպան չի լինում: Պարզապես հասարակության մտահոգությունը նրանց նկատմամբ պայմանավորված է նրանով, որ այդ տարիքում սեփական կյանքին վերջ տալու հավանականությունը մեծ է:
Դեռահասների սթրեսային հոգեվիճակն են ցույց տալիս նաև նրանց կրած հագուստի գույները. սևը` սթրեսի, մորեգույնը` չիրականացված ծրագրերի, իսկ ավելի քիչ հանդիպող կանաչը` հոգեկան անհավասարակշռության մասին է խոսում:
