Մեծամորի քաղաքապետ, քաղաքապետի թեկնածու Ռոբերտ Գրիգորյանն իր նախորդ չորս տարիների աշխատանքը «գերազանց» է գնահատում, բայց ասում է՝ ամենակարևորը ժողովրդի գնահատականն է:
«Առաջին լրատվական»-ի հետ զրույցում քաղաքապետը նշեց, որ այսօր քաղաքի ընտրատեղամասերում միջադեպեր չեն գրանցվել. ժողովրդավար ընտրություններ են անցկացվում Մեծամորում: Ռոբերտ Գրիգորյանը դեռևս ունի կիսատ ծրագրեր, որոնք ցանկություն ունի ավարտին հասցնելու: Նա նշեց, որ նորմալ հարաբերությունների մեջ է իր մրցակից Աշոտ Գրիգորյանի հետ, միմյանց հանդեպ հարգանք կա: Ինչ վերաբերում է նրան, որ Ռոբերտ Գրիգորյանին սատարում է իշխող ՀՀԿ կուսակցությունը, ապա դա, ըստ նրա, չի ազդում ընտրությունների ելքի վրա:
«Էդ, որ ՀՀԿ-ն շատ հզոր ա, բոլորին ա հայտնի: Բայց նման պահերին չի կարելի ասել, որ եթե ՀՀԿ-ն ա սատարում, պետք ա թեկնածուն անցնի, եթե չէ, չէ: ՀՀԿ-ն շատ նորմալ, լուրջ վերաբերմունք ունի համայնքի ղեկավարների նկատմամբ: Եվ ինձ չի թվում, որ եթե ՀՀԿ-ական ա, ուրեմն թեկնածուն պիտի անցնի»,- նշեց նա:
Հիշեցնենք, որ Ռոբերտ Գրիգորյանի մրցակիցը Մեծամորի նախկին քաղաքապետ Աշոտ Գրիգորյանն է, ով գեներալ Մանվել Գրիգորյանի եղբայրն է:
