Samsung ընկերությունը հիշողության չիպեր չի մատակարարի նոր iPhone-ի համար, քանի որ ընկերությունները չեն կարողացել համաձայնության գալ գնի շուրջ:
NEWSru.com կայքի փոխանցմամբ` նոր iPhone-ի համար օպերատիվ և մշտական հիշողություն ապահովելու են չինական Nynix-ը, թայվանյան Elpida-ն, ճապոնական Toshiba-ն: Վերջին ընկերության մասնակցությունը դեռևս հարց է, քանի որ Toshiba-ն հայտարարել է արտադրանքը 25-30%-ով կրճատելու մտադրության մասին:
Reuters ընկերության գնահատմամբ` այժմ Apple-ի տարբեր սարքավորումներում NAND հիշողության չիպերի կեսից ավելին մատակարարում է ճապոնական ընկերությունը, իսկ մնացած մասը տրամադրում է Samsung Electronics-ը:
Վերջերս հայտնի էր դարձել նաև, որ Samsung դիսփլեյները չեն կիրառվի iPhone 5-ում:
Samsung-ի արտադրության լիցքավորիչ մարտկոցները ևս չեն լինի Apple-ի սարքավորումներում, դրանք փոխարինվել են չինական Amperex Technology ընկերության արտադրանքով: Սակայն նախկինի նման սմարթֆոնների և պլանշետների պրոցեսորները կմատակարարի Apple-ի հարավկորեական մրցակիցը:
