Գերմանիան չի կարող երկրից վտարել Ուսամա բեն Լադենի նախկին թիկնապահ, իսլամի քարոզիչ, 36-ամյա Սամի Ա.-ին,- հաղորդում է dpa-ն: Իշխանություններն իրավունք չունեն նրան արտաքսել այնքան ժամանակ, քանի դեռ նրա հայրենիքում՝ Թունիսում, նրան խոշտանգումներ են սպասվում: Այս մասին հայտարարել է Հյուսիսային Հռենոս-Վեստֆալիայի սահմանադրության պաշտպանության ծառայության ղեկավար Բուրքհարդ Ֆրայերը:
Գերմանիայի իշխանությունները կարողացել են հասնել միայն նրան, որ Սամի Ա.-ն ամեն օր ներկայանա Բոհումի ոստիկանություն: Այս պահին նա դա արել է ավելի քան 2000 անգամ: 2008 թվից Սամի Ա.-ն պետությունից ստանում է տարեկան 20 հազար եվրո դոտացիա՝ որպես փախստական: Նրա խոստովանությամբ՝ ինքը պատրաստվում է զբաղվել Բոհումում մզկիթի շինարարությամբ:
Միաժամանակ, տեղի մամուլի հաղորդմամբ՝ նա կապեր է պահպանում «դյուսելդորֆյան բջջի» 4 ենթադրյալ ահաբեկիչների հետ: Նրանք գտնվում են պետական անվտանգության աշխատակիցների հսկողության տակ 2010 թվից՝ այն բանից հետո, երբ իշխանությունները տեղեկություն ստացան, որ կասկածյալները նախատեսում են պայթյուն կազմակերպել մարդաշատ վայրում: Այժմ նրանց դեմ դատավարությունը շարունակվում է: Որոշ տեղեկություններով՝ Սամի Ա.-ն կապ է ունեցել ԱՄՆ-ի սեպտեմբերի 11-ի ահաբեկչությունն իրականացնողների հետ:
Սամի Ա.-ն ամուսնացած է Գերմանիայի քաղաքացու հետ, որից ունի երեք երեխա: Կնոջ ծագումը հայտնի չէ: Հաղորդվում է միայն, որ նա Գերմանիայի քաղաքացիություն է ստացել ամուսնությունից առաջ, իսկ նրա հարազատները կապ են պահպանում «Ալ-Քաիդա»-ի անդամների հետ:
Մամուլի տեղեկացմամբ՝ Սամի Ա.-ն 2000 թ. սովորել է Աֆղանստանում ահաբեկիչների ճամբարում, սակայն Գերմանիայում նրան դրա համար չեն կարող պատասխանատվության ենթարկել: Նման հոդված քրեական օրենսգրքում ներառվել է միայն սեպտեմբերի 11-ի ահաբեկչությունից հետո: 2006 թ. Սամի Ա.-ի դեմ հետաքննություն է սկսվել՝ արտասահմանյան ահաբեկչական կազմակերպություններին հարելու կասկածանքով, սակայն 2007 թ. հետաքննությունը դադարեցվել է բավարար չափի ապացույցներ չլինելու պատճառով:
