«Ազատություն» ռադիոկայանի փոխանցմամբ` Հունգարիայի արտգործնախարար Յանոշ Մարտոնին տեղեկացրել է, որ երկուշաբթի օրը Շվեյցարիա կատարած իր այցի ընթացքում իր շվեյցարացի գործընկեր Դիդիե Բուրկհալթերն օգնություն է առաջարկել Հունգարիայի և Հայաստանի միջև խզված հարաբերությունները հարթելու գործում։
«Հունգարիան ընդունել է ադրբեջանցի մարդասպանի էքստրադիցիայի պատճառով Հայաստանի հետ վեճը հարթելու հարցում Շվեցարիայի միջնորդական առաջարկը»,- Հունգարիայի պետական ռադիոյի եթերում այսօր հայտարարել է Մարտոնին, – «Շվեցարիան՝ իբրեւ չեզոք երկիր, ավանդաբար հանդես է եկել միջնորդական առաքելությամբ, և Հունգարիան բոլոր հնարավոր ձևերը պետք է օգտագործի՝ Հայաստանի հետ լարվածությունը թուլացնելու համար»։
Հունգարիայի արտգործնախարարը նաեւ հայտարարել է, որ Ադրբեջանը «խախտել է խոստումը» և ներում շնորհել Ռամիլ Սաֆարովին։
Մարտոնին կարծիք է հայտնել, որ այդ «ցավալի փաստը պետք է դատապարտվի»։
«Այժմ ամենակարեւորն այն է, որպեսզի հայերը հասկանան՝ Հունգարիան նրանց միշտ համարել է բարեկամ», – ասել է Հունգարիայի արտգործնախարարը։
2004 թվականին Բուդապեշտում հայ սպա Գուրգեն Մարգարյանին կացնահարելու համար Հունգարիայի դատարանի կողմից ցմահ ազատազրկման դատապարտված ադրբեջանցի սպա Ռամիլ Սաֆարովը էքստրադիցիայի է ենթարկվել Ադրբեջան և անմիջապես ներում ստացել Իլհամ Ալիևի կողմից: Ի պատասխան՝ Հայաստանը կասեցրել է դիվանագիտական հարաբերությունները Հունգարիայի հետ։
