ԱՄՆ պետպարտքը պատմության մեջ առաջին անգամ հատել է 16 տրիլիոն դոլարի նշագիծը: Այս մասին հաղորդում է ITAR-TASS-ը` հղում անելով ԱՄՆ Ֆինանսների նախարարությանը: Այսպիսով` ԱՄՆ յուրաքանչյուր քաղաքացու, այդ թվում նորածինների վրա ընկնող պարտքը կազմում է 50 հազար 909 դոլար:
Յուրաքանչյուր հարկատուի բաժին է ընկնում 140 հազար դոլար: Մարդահամարի ամերիկյան բյուրոյի տվյալներով `ներկայում երկրում բնակվում է ավելի քան 314 մլն մարդ, որից 114 միլիոնը` հարկատուներ:
RBK-ի փոխանցմամբ` բյուջեի պակասուրդը կազմում է 1,2 տրիլիոն դոլար: Ամերիկյան բյուջեի ամենածախսատար բժշկական ծրագրերն են Medicare-ը և Medicaid-ը`(ավելի քան 789 մլրդ դոլար):
Վերլուծաբանները հիշեցնում են, որ ԱՄՆ-ում պետպարտքի վերին շեմը ներկայում կազմում է 16,394 տրիլիոն դոլար: Նրանց կարծիքով` իրավիճակն այնպես է զարգանում, որ նոյեմբերի 6-ին կայանալիք նախագահական ընտրություններում հաղթող թեկնածուի առաջին քայլը պետք է լինի պետպարքտի առաստաղի բարձրացումը: Նրանք հիշեցնում են նաև, որ անցած տարի հազիվ հնարավոր եղավ խուսափել դեֆոլտից`այդ թեմայով դեմոկրատների և հանրապետականների միջև առկա տարաձայնությունների պատճառով:
