ԵԱՀԿ-ի պաշտոնական կայքի փոխանցմամբ՝ ԵԱՀԿ Մինսկի խմբի համանախագահները՝ Ռոբերտ Բրադտկեն (ԱՄՆ), Իգոր Պոպովը (Ռուսաստան), Ժակ Ֆորը (Ֆրանսիա), և ԵԱՀԿ գործող նախագահի անձնական ներկայացուցիչ Անջեյ Կասպրշչիկը սեպտեմբերի 2-ին Փարիզում Հայաստանի արտգործնախարար Էդվարդ Նալբանդյանի և սեպտեմբերի 3-ին Ադրբեջանի արտգործնախարար Էլմար Մամեդյարովի հետ հանդիպումներից հետո համատեղ հայտարարություն են տարածել:
Հայտարարության մեջ նշված է, որ այդ հանդիպումներում կողմերը քննարկել են տարածաշրջանային վերջին զարգացումները և Ղարաբաղյան հակամարտության խաղաղ կարգավորման ուղղությամբ գործադրվող ջանքերը:
Համանախագահներն արտգործնախարարների հետ քննարկել են նաև օգոստոսի 31-ին Ադրբեջանի կառավարության որոշմամբ ադրբեջանական բանակի սպա Ռամիլ Սաֆարովի համաներման հարցը, ով 2004 թվականին Բուդապեշտում հայ սպային սպանելու համար ցմահ ազատազրկում էր կրում Հունգարիայում:
Համանախագահները խորը մտահոգություն և ափսոսանք են հայտնել այդ կապակցությամբ և հայտնել, թե Սաֆարովին համաներելն ու հանցագործությունը հերոսացնելու յուրաքանչյուր փորձ ինչպիսի վնաս կարող է պատճառել բանակցային գործընթացին ու կողմերի միջև վստահության մթնոլորտի ձևավորմանը:
Հայտարարության մեջ նաև նշված է, որ Ղարաբաղյան հակամարտության խաղաղ կարգավորումը չունի այլընտրանք: Համանախագահները պայմանավորվել են, որ շարունակելու են իրենց շփումները հակամարտող կողմերի հետ՝ նվազեցնելու համար առկա լարվածությունը և բանակցային գործընթացում առաջընթաց գրանցելու համար:
