«Ինտեր»-«Բավարիա». վերջին անգամ այս թիմերն իրար հետ խաղացել էին անցյալ տարվա մայիսին` Չեմպիոնների լիգայի եզրափակիչում: Այն ժամանակ «Ինտերը»-ը, Ժոզե Մոուրինյոյի գլխավորությամբ, Մադրիդում 2:0 հաշվով առավելության հասավ գերմանական ակումբի նկատմամբ ու նվաճեց բաղձալի գավաթը: Մոուրինյոն այդուհետ իր գործն իտալական ակումբում կատարած համարեց. թիմը հանձնեց Բենիտեսին և տեղափոխվեց Մադրիդի «Ռեալ»: Բենիտեսի օրոք «Ինտեր»-ը ոչնչով աչքի չընկավ։ Բոլորովին վերջերս իսպանացին հեռացվեց պաշտոնից, և նրա տեղը վստահվեց երիտասարդ Լեոնարդոյին: Այժմ «Ինտեր»-ի արդյունքները որոշակիորեն ստաբիլացել են. թիմը շատ լավ է գործում հարձակման գծում, բայց պաշտպանությունում խնդիրներն ակնհայտ են: Ահա որքան բան է փոխվել իտալական ակումբում Չեմպիոնների լիգայի վերջին խաղարկությունում հաղթելուց ի վեր:
«Բավարիա»-ում փոփոխությունները շատ ավելի քիչ են: Խաղաոճն ամբողջությամբ պահպանվել է, մի քանի խաղացողներ են ավելացել: Տիմոշուկը դարձել է հիմնական կազմի խաղացող, եվրոգավաթներին երբևէ չմասնակցած թիմի նորեկ Լուիս Գոստավոն առաջին անգամ դուրս եկավ խաղադաշտ և իրեն շատ լավ դրսևորեց: Նշենք նաև Ռոբենի վերադարձը, որը երկար ժամանակ բացակայում էր վնասվածքի պատճառով:
Առաջին խաղակեսն անցավ փոխնիփոխ գրոհներով: «Ինտեր»-ը շատ ակտիվ սկսեց. 1-ին իսկ րոպեին Ռանոկիոյի կատարած հարվածը կարող էր առաջ մղել տանտերերին: Խաղակեսի միջնամասում Կամբիասսոն Էտոոի անցումից ու կատարած փոխանցումից հետո պարտավոր էր գրավել դարբասը, բայց Կրաֆտը փրկեց: Շուտով վան Գալի սաներին հաջողվեց հավասարեցնել խաղը, և դրությունն արդեն սկսեց թեժանալ Սեզարի դարպասի մոտ: Ռոբենի փոխանցումից հետո Ռիբերիի գլխով կատարած հարվածը դիպավ հորիզոնական դարպասաձողին: Գնդակը կենտրոնում չէր մնում. Էտոոն թվում էր՝ հարյուր տոկոսանոց դիրքից հարվածեց, բայց կրկին հրաշալի խաղաց Կրաֆտը: Թիմերը ևս մի քանի սուր գրոհներ կազմակերպեցին, բայց մինչ ընդմիջում այդպես էլ հաշիվը չբացվեց:
Երկրորդ խաղակեսը նույնպես անցավ հավասար պայքարում: Մեկնարկային րոպեներն ամբողջությամբ առաջին խաղակեսի շարունակությունն էին. թիմերը փոխնիփոխ սուր գրոհներով հանգիստ չէին տալիս դարպասապահներին, բայց, ի վերջո, խաղը հանգստացավ, և սկսեցին ավելի շատ ժամանակ անցկացնել կենտրոնում: Թվում էր՝ ոչ ոքին այս հանդիպման ճիշտ արդյունքն է, սակայն խաղավերջում բախտը ժպտաց մյունխենցիներին. աշխարհի լավագույն դարպասապահներից մեկը` Ժուլիո Սեզրը, տեղի տվեց: 90-րդ րոպեին Ռոբենի հեռահար հարվածից հետո բրազիլացին չկարողացավ ֆիքսել գնդակը, իսկ վրա հասած Գոմեսը հաղթանակ պարգևեց իր թիմին: Պատասխան խաղից առաջ արդեն բացահայտ ֆավորիտը «Բավարիան» է: