Իսպանական լրատվամիջոցները հայտնում են, որ Մադրիդի «Ռեալ»-ի հարձակվող Քրիշտիանու Ռոնալդուն իր ներկայիս ակումբը լքելու մտադրություն ունի:
Պորտուգալացի ֆուտբոլիստն արդեն զրույց է ունեցել ակումբի նախագահ Ֆլորենտինո Պերեսի և գլխավոր տնօրեն Խոսե Անխել Սանչեսի հետ:
Երբ «Սանտիագո Բեռնաբեո»-ում պաշտոնապես ներկայացվել է թիմի նոր ֆուտբոլիստ Մայքլ Էսյենը, Ռոնալդուն մոտեցել է Պերեսին և Սանչեսին ու հայտնել իր ցանկության մասին:
Հիշեցնենք, որ Ռոնալդուն հայտարարել էր, թե երջանիկ չէ «արքայական ակումբ»-ում, ինչի պատճառով չի տոնում իր գոլերը:
Իսպանական լրատվամիջոցների տեղեկությունների համաձայն` պորտուգալացի ֆուտբոլիստի նման որոշումը պայմանավորված է խաղընկերների հետ լարված փոխհարաբերություններով: Նրանց թվում նշվում է Մարսելոն, ով հայտարարել էր, թե հերթական «Ոսկե գնդակ»-ը պետք է նվաճի Իկեր Կասիլյասը, ինչը դուր չի եկել Ռոնալդուին:
Բացի այդ՝ նշվում է, որ ֆուտբոլիստը ցանկանում է, որպեսզի «արքայական ակումբ»-ը վերանայի իր պայմանագրի պայմանները:
