ԱՄՆ նախագահ Բարաք Օբաման օգոստոսի 29-ին պատասխանել է հայտնի լրատվական Reddit ռեսուրսի այցելուների հարցերին: Օբաման մասնակցել է Ask Me Anything նախագծին: Նա այցելուների հարցերին պատասխանել է օնլայն ռեժիմով՝ ավելի քան 1 ժամ:
Reddit-ում նախագահի հայտնվելը նախապես չէր գովազդվել: Այն բանից հետո, երբ Օբաման ողջունել է այցելուներին և առաջարկել իրեն հարցեր տալ, օգտատերերը կասկածել են, թե արդյո՞ք իրենց հետ հենց նա է խոսում:
Այցելուների կասկածները ցրելու համար կայքի ղեկավարությունը ստիպված է եղել «իրողությունը հաստատող» լուսանկար հրապարակել, որում Օբաման պատկերված է նոթբուքի առջև նստած: ԱՄՆ նախագահը Reddit-ում իր մասնակցության փաստը հաստատել է Twitter միկրոբլոգների ցանցի իր պաշտոնական էջում:
Ընդհանուր հաշվով Օբամային տրվել է 10 հազար հարց: Օբաման պատասխանել է այն հարցերին, որոնք համընդհանուր ուշադրության են արժանի: Հարցին` ո՞րն է եղել ամենաբարդ որոշումը, որը նա կայացրել է որպես նախագահ, Օբաման պատասխանել է` դա եղել է Աֆղանստանում ամերիկյան զորակազմի ընդարձակման մասին որոշումը:
Օբաման նաև պատասխանել է այն հարցին, թե պատրաստվո՞ւմ է արդյոք ինտերնետի ազատության հարցը ներառել Դեմոկրատական կուսակցության նախընտրական արշավում: Օբաման վստահեցրել է, որ ինքը և իր կողմնակիցները կանեն հնարավոր ամեն ինչ, որպեսզի ինտերնետը մնա ազատ հրապարակ բոլորի համար, և խոստացել է, որ այդ դիրքորոշումը կարտացոլվի իր նախընտրական արշավում: Օբաման պատասխանել է նաև կոռուպցիայի դեմ պայքարի և տիեզերական ծրագրերի զարգացման հեռանկարների վերաբերյալ հարցերին:
«Սիրո՞ւմ եք կատուներին», «Պատրաստվո՞ւմ եք դաշնային մակարդակով օրինականացնել մարիխուանան» հարցերին Օբաման չի պատասխանել: Օբաման հայտնել է, որ մոտ ժամանակներս պատրաստվում է բացահայտել Սպիտակ տանը պատրաստվող գարեջրի բաղադրատոմսը, որը ցանկանում են իմանալ շատ-շատերը:
Ի դեպ, Օբաման ուղղագրական կանոններին չի հետևել, «Hey everybody – this is barack» արտահայտության մեջ իր անունը գրել է փոքրատառով, իսկ տիեզերական ծրագրերի վերաբերյալ հարցին պատասխանելիս գրել՝ «a asteroid»՝ an asteroid-ի փոխարեն: Reddit-ով շփումը Օբամայի նախընտրական արշավի մասն է:
